Акбар Исматуллаев Таиланднинг 7 карра чемпиони сафига қўшилди
31 авг 2020 20:21
Янгиликлар

Акбар Исматуллаев Таиланднинг 7 карра чемпиони сафига қўшилди

Ўзбекистон терма жамоаси ва "Металлург" клуби ҳимоячиси Акбар Исматуллаев легионерга айланди.

Исматуллаев Таиланднинг 7 карра чемпиони "Бурирам" клуби билан шартнома тузди. Ўтган мавсумда "Бурирам" Таиланд чемпионатида кумуш медалларга эга чиқди.

"Бурирам Юнайтед" футбол клуби 1970 йилда ташкил топган. Уй ўйинларини 32600 томошабинга мўлжалланган "Чанг Арена" стадионида ўтказади. Бугунги кунда жамоани черногориялик мураббий Божидар Бандович бошқариб келмоқда. Клуб яқинда "Пахтакор"да ўйнаган исроиллик Гиди Канюк билан ҳам шартнома тузганди. Бундан ташқари хорватиялик Ренато Келич ва сербияик Марко Цепович каби легионерлар ҳам "Бурирам" сафига қўшилишди.

2012 йилда "Бурирам" сафида ўзбекистонлик Анвар Ражабов тўп тепган эди.

Таиланд чемпионатида 4та турдан кейин пандемия туфайли танаффус юзага келган. 5-тур ўйинлари 12-13 сентябрь кунлари бўлиб ўтади. Бу турда "Бурирам" "Бангкок Гласс" меҳмони бўлади.

Маълумот учун, Таиландда яна бир ҳамюртимиз Сардор Мирзаев ҳам тўп тепмоқда. У "Муангтонг Юнайтед"да ўйнамоқда.

Акбар Исматуллаев 2009-2017 йилларда "Пахтакор" клубида ўйнаган, 2018 йилдан буён "Металлург" сафида фаолият олиб бормоқда. Ўзбекистон терма жамоаси сафида 5та ўйинда майдонга тушган.