"3:6 ҳисобидаги мағлубият, бугунги ўйинга тахминлар ва ёдда қолган тўқнашувлар" - "Нефтчи" собиқ юлдузлари "Пахтакор" билан ўйиндан олдин

Гарчи ҳозирга келиб ўша вақтдаги юлдузлар аллақачон бутсаларини михга илиб, мураббийлик ва бошқа соҳаларда фаолият олиб боришаётган бўлсада, championat.asia сайти бугун бўлиб ўтадиган "Пахтакор" - "Нефтчи" учрашувидан аввал уларни бир жойга тўплашга қарор қилди. Демак Абдумажид Тоиров, Анвар Бердиев, Санжар Асқаралиев, Акмал Ҳолматов "Ўзбек Эль Класико"сидан олдин ўзларининг мулоҳазаларини билдириш билан бир қаторда, драматик кечган учрашувларни ҳам ёдга олишди. 

Анвар Бердиев: - Бугун ажойиб ўйин кутмоқдаман. "Пахтакор" - "Нефтчи" қарама-қаршилигини узоқ кутдик. Ўша кун келди. Мавсум стартини икки жамоа юқори кайфиятда келяпти. Боиси илк турда ғалаба қозонишди. Имкониятлар 50/50

Фаолиятимдаги энг ёдда қолган ўйин 2001 йилги мавсумда бўлган. Рақобат кучли бўлган даврлар эди. "Нефтчи" иккинчи ўринда кетяпти. "Пахтакор" билан сафарда ўйнаяпмиз. Тошкентда 2:1 ҳисобида ғалаба қозониб амалда чемпионликни ҳал қилгандик. Мазкур баҳсда ўзим ҳам тўп киритганман. 

Аввалги "Нефтчи" қайтишига ишонаман. Чунки Фарғона вилояти ҳокими Хайрулла Бозоров бунинг учун кўп ишларни амалга оширяптилар. Уларнинг ишларига барака берсин, деб қоламан. "Нефтчи" жамоасига омад тилайман. Бу ўйинда фарғоналик мухлислар билан биргаман. 

Санжар Асқаралиев: - Менимча ушбу баҳсга ортиқча таърифнинг кераги йўқ. Олдиндан қизиқарли ва томошабоп ўйин бўлиб келган. Фикримча, "Пахтакор" минимал ҳисобда ғалаба қозонса керак, деб ўйлайман. 

Хотирамдан ўчмайдиган учрашув Фарғонада ўтган. "Пахтакор"нинг ғалабали сериясини Акмал Ҳолматовнинг голи билан бузганмиз. Тошкент жамоаси Фарғонада биринчи мағлубиятини қабул қилиб олган. 

Абдумажид Тоиров: - Қизиқарли баҳс бўлиб ўтишини истардим. Чунки "Ўзбек Эль Класико"си номига муносиблигини йўқотмаслиги керак. Бугунги "Пахтакор" таркибида ғалабага чанқоқ ёшлар ва тажрибали ижрочилар йиғилган. "Нефтчи" эса Яйпандаги дербидан сўнг Тошкентга фақат ғалаба илинжида келиши табиий. 

"Нефтчи" либосида "Пахтакор"га қарши ҳар бир учрашув ёдимда. Биттасини танлашга келсак, 2002 йилги Ўзбекистон Кубоги финалидаги 3:6 ҳисобида мағлуб бўлган ўйин. Бундай финал яна қайтарилмаса керак. 

Илҳом Мўминжонов бу ўйинда уч очко олиш учун қандайдир совға тайёрлаши шарт. Унинг қўлидан келадими ёки йўқми, ўйин давомида кўрамиз. 

Акмал Ҳолматов: - Мен учун бу ўйин ҳақида гапириш жуда қийин. Сабаби "Нефтчи"да Акмал Ҳолматов, деган номни орттирганман. Ҳозирги кунда Диёр Ҳолматов "Пахтакор"да ўйнамоқда. Яхши ўйин кўрамиз, деб ўйлайман. Кучли жамоа ғалаба қозонсин. Икки жамоага омад тилайман. Лекин Диёрга кўпроқ мухлислик қиламан. 

"Пахтакор" - "Нефтчи" ҳар бир тўқнашувда драматик жанг кўрардик. Ҳамма ўйин ёдимда.