"2022 йилги ЖЧ шунчаки Мессига бериб юборилганини ҳамма билади" — Патрис Эвра

У RMC эфирида ҳатто францияликлар ҳам Аргентина ғалабасини кўришни хоҳлаганини таъкидлади.

"Яхши, биз 2018 йилдан бери ғалаба қозонмадик, лекин 2022 йилда Жаҳон чемпионати шунчаки Мессига бериб юборилганини ҳамма билади. Ҳаммаси олдиндан белгилаб қўйилганди, ҳатто францияликлар ҳам шуни хоҳлаган... Франция – Аргентина финали бошидаги пенальтини эсланг", – деди Эвра.

"Манчестер Юнайтед"нинг собиқ футболчиси, шунингдек, Дидье Дешамнинг келажаги ҳақидаги доимий гап-сўзларга нуқта қўйиш кераклиги, асосий эътиборни навбатдаги Жаҳон чемпионатига тайёргарлик кўришга сарфлаш зарурлигини қайд этди.

"Биз ҳали ҳам Дешам ҳақида гапиряпмиз. Одамлар ҳар бир турнирдаги финал ва ярим финалдан чарчадими? Сиз ғалаба қозонишни хоҳлайсизми ёки шунчаки чиройли ўйнашними?"

Дидье Дешамнинг узоқ йиллик фаолияти поёни аллақачон режалаштириб қўйилган ва Зинедин Зидан ЖЧ-2026дан кейин Франция бош мураббийи лавозимини эгаллаши муқаррар.

Эслатиб ўтамиз, Аргентина 2022 йил Қатарда бўлиб ўтган мундиаль финалида Францияни мағлуб этганди. Асосий вақт 3:3 ҳисобида якунланган ва пенальтилар сериясида аргентиналиклар 4:2 ҳисобида зафар қучган.