"Водий футболи": 17-турда иккита ғалаба ва иккита мағлубият

"Андижон": "Машъал" мағлуб этилди

Олий лиганинг 17-турида "бургутлар" Муборакнинг "Машъал" клубини қабул қилди. Ўйин тақдирини иккинчи бўлимда Иқбол Бобохоновнинг пенальтидан урган голи ҳал қилди - 1:0.

"Андижон" 4 ўйинлик мағлубиятли сериядан сўнг ғалаба қозониб ўз очколарини 14тага етказиб олди. Жамоа 13-поғонада бормоқда.


"Навбаҳор": Бекободдан ғалаба билан

Бахтиёр Ашурматов бошчилигидаги "Навбаҳор" клуби Бекободда "Металлург" клуби меҳмони бўлди. Учрашувда "лочинлар" 3:2 ҳисобида зафар қучишди.

Қаҳрамон Муҳаммаджонов, Дилшод Жабборов ва Шаҳбоз Эркинов томонидан урилган голлар "Навбаҳор"га ғалаба келтирди. Жамоа 22 очко билан мусобақа жадвалининг 8-ўринига чиқиб олди.

"Қўқон-1912": Тошкентда йирик мағлубиятга учрадик

"Пахтакор" меҳмони бўлган қўқонликлар чемпионга 1:4 ҳисобида ютқазиб қўйишди.

Водий клуби сафида ягона жавоб тўпини иккинчи давра бошида яна жамоага қайтган Отабек Ҳайдаров киритди.

"Қўқон-1912" 14 очко билан мусобақа жадвалининг 14-поғонасида бормоқда.


"Нефтчи": "Локомотив"га ютқаздик

Мурод Исмоилов бошчилигидаги "Нефтчи" кетма-кет иккинчи ўйинда ҳам мағлуб бўлишди. Иккинчи даврани Ғузордаги йирик мағлубият билан бошлаган фарғоналиклар бу сафар "Локомотив"га ютқазиб қўйишди - 1:2.

Мурод Бобожоновнинг битта голи жамоани мағлубиятдан қутқариб қола олмади.

Уч ўйиндан буён юта олмаётган "Нефтчи" 33 очко билан 5-ўринга тушиб қолди.