Вегхорст МЮ мухлисларини ғазаблантирди: 0:7дан олдин "Бу Энфилд" ёзувига тегди. Энди эса ўзини оқламоқда (мутолаа учун)

"Манчестер Юнайтед" "Энфилд"да 0:7ни қабул қилиб олди, мухлислар эса айбдорни топишди – бу нидерландиялик ҳужумчи Ваут Вегхорст.

Барчасига МЮ футболчисининг майдонга чиқишдан олдин This is Anfield (Бу "Энфилд") ёзувига теккани сабаб.

Бу мухлисларнинг ғазабига сабаб бўлди.

У қандай ёзув? Унга рақиблар тегиши мумкинмасми?

This is Anfield ёзуви – "Ливерпуль" стадионининг бош рамзларидан биридир. "Қизиллар"нинг кўплаб мухлислари унга тегишни хоҳлашади.

Бу белгини ўз вақтида афсонавий мураббий Билл Шенкли осиб қўйган: "У бу ерда биз ким учун ўйнаётганимизни ва рақиблар кимга қарши ўйнаётганини эслатиб туради".

"Ливерпуль" футболчилари узоқ йиллар майдонга чиқишдан олдин ушбу ёзувга тегинишган. Юрген Клопп This is Anfield'ни ўйинчилар учун ўзига хос мотивация учун ишлатган. Немис жамоада ҳеч ким соврин ютмагунча белгига тега олмаслигини айтган. Футболчилар ҳам 2019 йил Чемпионлар лигасидаги ғалабагача ёзувга тегишмаган.

Рақибларга келсак, уларга ёзувга тегиш таъқиқланганми? Ҳеч қаерда бундай қоида йўқ, кимдирга буни қилиш ёқади. Масалан, Иан Райт Вегхорстнинг тарафини олди ва ўзи ҳақида айтиб берди:

"Албатта, унга текканман. Аммо, йигитлар билан ўйинга чиқиш олдидан эмас, қизиб олиш машқларидан олдин. Майдонга чиқасан, белгини кўрасан ва тегмай кета олмайсан. Бу ахир афсона-ку!"

"Ливерпуль" (ва "Эвертон") собиқ футболчиси Дон Хатчинсон майдонга чиқишдан олдин кўплаб меҳмон жамоалар ўйинчиларининг This is Anfield'га тегишганини ёзган. Гарчи, унинг ўзи "Эвертон"да ўйнаган пайти бундай қилмаган бўлса ҳам.

Бу ерда 2014 йилда Карло Анчелотти белги билан суратга тушмоқда.

Йосип Иличич умуман This is Anfield'га тегаётгани акс этган татиуровка қилдирган.

Рақиб жамоаларда ўйнаган "Ливерпуль"нинг айрим мухлислари ҳам ушбу белгига тегишган. "Блэкберн" ўйинчиси Робби Слейтер 1995 йилда белгига текканини ва "қизиллар" футболчиси Жон Барнсдан гап эшитганини тан олган: "У менга бақирди ва рақиб сафида ўйнаётганимни айтди. Унга эса "Ливерпуль"га мухлислик қилишимни ва белгига тегиш учун тўлиқ ҳуқуқим борлигини айтдим. "Блэкберн" ўшанда "Энфилд"да ғалаба қозонди".

Вегхорстдан ташқари майдонга чиқиш олдидан белгига Виржил ван Дейк, Трент ва Харви Эллиотт (сўнгги иккиси – болаликдан "Ливерпуль" мухлислари) тегишди. Шунингдек Коди Гакпо – гарчи у клуб билан ҳали ҳеч нарса ютмаган бўлса ҳам.

Вегхорст "Ливерпуль"га муҳаббатини тан олди. Ие

Аслида гап Вегхорстнинг белгига текканида эмас. Ваут бир неча бор "Ливерпуль"га муҳаббатини тан олган. Бу илк бор 2018 йилда "Вольфсбург"га ўтганидан кўп ўтмай янграган.

"Болалигимдан "Ливерпуль" сафида "Энфилд"да ўйнашни орзу қилганман. Агар тўлиқ боримни берсам, менга бундай имконият тақдим этилади деб ўйлайман", – деган ҳужумчи De Telegraaf билан интервьюда.

Икки йилдан сўнг ҳам бу фикр ўзгармади:

"Ливерпуль"ни ўзгача клуб деб ҳисоблайман. Ҳалигача You'll Never Walk Alone'дан этларим жимирлаб кетади. Шунингдек бошқа буюк Англия клублари бор, мен шунингдек доим "Милан"ни қўллаб-қувватлаганман – у ерда ажойиб нидерланд футболчилари ўйнашган".

Аммо, Ваут "Ман Юнайтед"га ўтганидан кўп ўтмай янги жамоаси учун бор кучини ишга солишини айтди: "Бу ўзгача лаҳза. Жуда ғурурламан ва клуб учун ўйинларда боримни бераман".

Мухлислар жуда норози: ҳатто Вегхорстни клубдан йўқотишга чақиришмоқда

Албатта, белгига тегиниш ва ўтган гаплар "Юнайтед" мухлисларини ғазаблантирган – улар бор ғазабларини Вегхорстга сочишди.

Нидерландияликни ижтимоий тармоқларда бундай ҳаракат учун танқид қилишди.

"Манчестер Юнайтед" ўйинчиси қилмаслиги керак бўлган нарсалар бор – бу энг аниқ нарса. "Бёрнли"/Туркия ёки қаердан келган бўлса ўша ерга кетиши мумкин".

"У ортиқ "Манчестер Юнайтед"да ўйнаши керакмас. "Ливерпуль" мухлислари ушбу белгига тегишни орзу қилишларини барча билади. Буни кечириб бўлмайди".

"Белгига теккан илк МЮ ўйинчиси".

"Ўйин бошлангунга қадар ютқазган эдик"

Рой Кин ҳам бирга:

"Ҳеч қачон белгига тегмаганман. Бу бемаънилик. Ҳа, бу "Ливерпуль" футболчилари учун анъана, аммо рақиблар учун эмас".

Вегхорст ўзини оқламоқда: белгига Ван Дейкнинг жаҳлини чиқариш учун теккан

"Энфилд"даги йирик мағлубиятдан сўнг нидерландиялик ҳужумчининг ўзи ҳам тушунтириш берди. Ҳаммани "Ливерпуль"га мухлислик қилмаслигини ишонтиришга уринди, белгига эса Ван Дейкнинг жаҳлини чиқариш учун теккан:

"Одатда медиадаги шовқинларга муносабат билдирмайман, аммо бу ўзгача ҳолат. Сабаби "Манчестер Юнайтед"нинг ажойиб мухлислари мен учун жуда муҳим. Шу сабаб тармоқларда айланаётган видео бўйича тушунтириш бермоқчиман.

Терма жамоадан биламанки, Виржил доим ўйинлар олдиндан ушбу белгига тегади. Ва бу мен ҳам текканимнинг ягона сабаби", – унга буни қилишга имкон бермаслик ва узоқлаштириш.

Болаликдан "Твенте"га мухлислик қиламан, шунингдек ҳозир ўйнаётган ва ғурурланадиган "Манчестер Юнайтед"га ҳам. Менинг ушбу буюк клубга бўлган содиқлигим шубҳа остига олинмаслиги керак.

Якшанба барчамиз учун даҳшатли кун бўлди. Биз буни яқин ҳафталарда тўғирлаш учун максимум кучимизни ишга соламиз. Биргаликда зарбадан тикланамиз ва мавсумдаги барча мақсадларимизга эришамиз".

Трибуна остидан олинган видеога қарасак, Ваут ҳақиқатдан ҳам Ван Дейкдан сўнг дарҳол белгига теккан. "Ливерпуль" ҳимоячиси қўлини олгандан сония ўтиб. Вегхорстнинг рақибларни жаҳлини чиқариш хоҳиши ҳақида Аргентина терма жамоаси футболчилари айтиб беришганди: Лео Месси Ваутнинг ўйиндан олдинги провокацияси сабаб интервью пайтида нидерландияликка гапириб кетганди.

Вегхорстга ишонамизми?

Sports.ru сайтидан Алишер Остонов таржимаси