Transfermarkt ва Championat.Asia Суперлигада август ойининг энг яхшиларини аниқлашди

Овоз беришда Transfermarkt'нинг рус тилидаги версияси ходимлари ва “Championat.Asia” таҳририяти иштирок этди, эксперт сифатида ўзбекистонлик футбол мутахассиси, ЖЧ-2022 ташкилий қўмитаси аъзоси Алишер Никимбаев қатнашди. Овоз беришда Суперлиганинг 14-18-тур натижалари инобатга олинди.

Кескин курашда Виталий Левченко ойнинг энг яхши мураббийига айланди. У Максим Шацкихни 2 баллга ортда қолдирди. Унинг қўл остида “Нефтчи” бешта ўйинда 2та ғалабага эришди (улардан бири “Пахтакор” устидан) ва учта дуранг қайд этди. "Нефтчи" айни пайтда Суперлигда учинчи ўринда бормоқда ва чемпионлик учун курашни давом эттирмоқда.

Суперлигада ойнинг энг яхши футболчиси деб "Пахтакор" вакили Диёр Холматов тан олинди. У 37% овоз олди, унинг энг яқин таъқибчилари – Фарруҳ Сайфиев ("Пахтакор") ва Муҳсин Убайдуллаев ("Нефтчи") 16%дан овоз олишди. Олтита ўйинда Холматов "гол+пас" тизими бўйича 3 балл тўплади ("Пахтакор" 15 июль куни 11-турнинг қолдирилган ўйинини "Насаф"га қарши ўтказди).