Яқинда мазкур мамлакатда биринчи давра баҳслари тугайди. Эшитишимизга қараганда ҳамюртимизга Таиланд ва бошқа мамлакатлардан таклифлар бор. Хўш, у фаолиятини Европада давом эттирадими ёки Осиёда? Бу борада Мурод Тўйчибоев сайтимизга фикрларини билдириб ўтди.
- Грузияда ишларингиз қандай кетмоқда? "Торпедо Кутаиси" билан шартномангиз қачонга мўлжалланган?
- Авваламбор ассалому алейкум. Грузияда ишларим худога шукур яхши. Сўнгги тўртта турда бирин-кетин рақибларимизни мағлубиятга учратмоқдамиз. Натижаларимиз ёмон эмас. - "Торпедо Кутаиси" билан шартномам шу йилнинг охиригача мўлажалланган. Йил якунида клуб билан тузган шартномам тугайди.
- Таиланд клубидан жиддий таклиф бўлгани ростми? Балки бу борада тез орада янгилик кўрармиз...
- Ҳа, Таиланд клубларидан чорлов бўлди. Уларнинг таклифи ўз кучида турибди. Айни пайтда Грузияда биринчи давра тугашини кутмоқдаман. Насиб қилса тез орада фаолиятимда янгилик бўлади.
- Европа футболи ҳавосини ҳис қилдингиз. Ўзбекистонлик футболчиларга у ерда ўйнаб кетишлари учун энг асосийси нима керак?
- Футболчида ўзига бўлган ишонч юқори бўлса бас. Бизнинг ёш футболчиларга озгина эътибор берилса ҳар қандай чемпионатда ўйнаб кета олишади.
- Грузияда қай томонлама ўсишни сездингиз? Аввалги мавсумларни Бангладеш чемпионатида ўтказгансиз. Икки қитъа футболи ўртасида тафовут бор барибир...
- Ўз кучимга ишончим ортди. Ўйлайманки, бу билан тўхтаб қолмайман. Олдинга интилишда давом этаман. Бугунги кун футболида тўхтаган инсон катта нарса йўқотади.
- "Торпедо Кутаиси"да бош мураббий билан алоқаларингиз қандай? Чунки Европа жамоаларига борган футболчиларимизнинг баъзиларида мураббий билан келиша олмаслик ҳолатлари учрамоқда...
- Илк кундан бошлаб бу борада муаммо кузатилмади. Клубдагилар мени яхши кўришади. Бош мураббий билан муносабатларим яхши. Кўп нарса ўрганишга ҳаракат қиляпман.
Абдулазиз Искандаров суҳбатлашди.
