Терма жамоага чақирилганлар ҳақида

ЎФФ расмий сайтида Ўзбекистон миллий терма жамоаси йиғилди деб ёзилган бўлса-да, аслида миллий терма жамоага яқин таркиб йиғилди десак тўғрироқ бўлади. Чунки миллий терма жамоа деганда кўз олдимизга шу заҳоти Виталий Денисов, Одил Аҳмедов, Сервер Жепаров, Санжар Турсунов, Игнатий Нестеров каби футболчилар келади. Ҳозирги жамоа кузда бўлиб ўтадиган Осиё ўйинларида иштирок этади. Бунда миллий терма жамоа эмас, балки 23 ёшгача футболчилардан иборат жамоа иштирок этади. Шунингдек, учта ёши катта футболчини қўшиб олиш мумкин.

Терма жамоамиз устози Миржалол Қосимов 9 кунлик йиғинга 26 нафар футболчини таклиф этди. Бизга маълум бўлишича, йиғин давомида тўртта назорат баҳси ўтказилади ва афсуски, ўйинларнинг ҳаммаси ўзимизнинг олий лига клублари билан бўлиб ўтади. Бу ўйинлар нима беради? Айтайлик, терма жамоа футболчилари учун “Металлург”, “Навбаҳор” каби клубларга қарши ўйнашнинг қизиғи борми? Агар Эфиопия келган тақдирда-ку зўр иш бўларди. Ҳамма жойда терма жамоалар ҳозир дам олаётган бўлиши мумкин. Аммо клублар янги мавсумга айни тайёргарлик ишларини олиб боришмоқда. Шундан келиб чиқиб ўзимиздаги тўртта клуб билан назорат ўйини ўтказгандан кўра 9 кун ичида хорижнинг иккита жамоаси билан ўртоқлик ташкил қилинса яхши бўлармиди.

Ана энди терма жамоага таклиф этилган футболчилар борасида ўз фикримизни билдириб ўтамиз.

ДАРВОЗАБОНЛАР
Миржалол Қосимов уч нафар дарвозабон чақирди. Ўртоқлик ўйинларида асосий дарвозабон “Насаф”дан Элдор Суюнов бўлади. Биринчи даврада атиги битта ўйинда майдонга тушган Муҳиддин Худоёров ҳам чақирилган. “Бунёдкор” ўринбосарларида ўйнаётган Абдукарим Муҳаммедов ҳақида эса кўп маълумотга эга эмасмиз.

ҲИМОЯЧИЛАР
Ҳимоячилар борасида нима дейиш мумкин? Айтиш мумкинки, 23 ёшгача бўлган ҳимоячилардан энг яхшилари термага жалб қилинган. Масалан, Бобур Йўлдошев билан Салим Мустафоев биринчи даврада кашфиёт бўлишди. Сардор Раҳмонов кам ўйин амалиётига эга бўлгани билан терма жамоа либосини кийиш унинг учун бегона эмас. Қолаверса, жамоа муҳитини ҳам яхши билади. “Машъал” сардори Шерзод Файзиев ҳам четда қолмади. Бу ҳимоячини терма либосида кўриш кўпчиликка қизиқ бўлса керак. Анчадан бери эътибордан четда қолган Жавлон Мирабдуллаев билан Азамат Исроилов ҳам машғулотларда иштирок этадиган бўлди. Шунингдек, биринчи даврада яхши ўйин кўрсатган Егор Кримец билан Акбар Исматуллаев ҳам таклиф қилинган. Ўйинида бироз пасайиш юзага келган Владимир Козак ҳам Осиё ўйинларига бориши мумкин.

ЯРИМ ҲИМОЯЧИЛАР
Ярим ҳимоя чизиғига 11 нафар футболчи таклиф этилган. “Навбаҳор”даги Азим Аҳмедовни тушунса бўлади, лекин “Нефтчи”даги Павел Смоляченко охирги пайтларда яхши ўйин кўрсата олмаяпти. Ундан кўра Абдуллоҳ Олимовнинг ўйинида ўсиш бор дейиш мумкин. Захирада ўтиравериб зериккан Сардор Мирзаевнинг терма жамоа ҳавосидан нафас олиб баҳри дили очилса ажаб эмас. Шундай экан, яхши футболчининг “Локо” захирасида ўтириши жуда ғалати албатта.
Биринчи даврада тўртта гол урган Диёр Туропов ҳам яхши ўйин намойиш этмоқда. Жамшид Искандеров-ку - гавҳар, уни асрашимиз керак. Мураббийлар унинг маҳоратига сайқал қўшишлари лозим. Сардор Собирхўжаев, Сардор Рашидов ва Алибобо Раҳматуллаев ҳам терма либосида ўзларини синаб кўришади. Бу ўйинчилардан ҳам умид катта. “Бунёдкор”дан Дилшод Жўраев ҳам четда қолмади. У ҳам биринчи даврада яхши ҳаракат қилди. Фаррух Сайфиев-ку кўпчиликнинг оғзига тушган футболчилардан бири бўлди. Жароҳат олгани боис Даврон Ҳошимовнинг ўрнига таклиф этилган Улуғбек Дадабоев борасида ҳам кўп мақтовларни эшитяпмитз. Демак, ўртоқлик ўйинларида бу футболчини ҳам кузатамиз.

ҲУЖУМЧИЛАР
Бош мураббий уч нафар ҳужумчини чақиришни лозим топди. Уммон билан кечган ўйинларда Наврўз Олимов билан Игорь Сергеев ўзини кўрсата олмади. Лекин хавотир олишга ҳожат йўқ, чунки ўзимизнинг олий лига клубларига қарши беллашувларда бу ҳужумчилар маза қилиб тўп тепишлари мумкин. “Металлург”дан чақирилган Шаҳзод Нурматов ҳам яхши ҳужумчи ҳисобланади. Лекин камчилиги шундаки, доим ҳам бир хил ўйин кўрсата олмаяпти. Нурматов янада ўсиши учун ўзини кучлироқ клуб сафида синаб кўриши керак деган фикрдамиз.

Х.Холиқов.