Терма жамоа. Жанубий Суданнинг даражаси ҳақида

ЎФА матбуот хизмати Сречко Катанец бошчилигидаги терма жамоамизнинг Жанубий Суданга қарши назорат учрашувида иштирок этишини маълум қилди. 

Трансфермаркт порталига эътибор қилсангиз, бу жамоа таркибида ярим нафар ҳам юлдуз йўқлигига гувоҳ бўласиз. Даҳшатли томони шундаки, Жанубий Судан терма жамоаси таркибининг умумий қиймати 225 минг еврога тенг (фақат 2 футболчига нарх белгиланган, қолганларни "ит танимайди"). 

Солиштириш учун, Про лиганинг ўтган мавсумида сўнгги поғонани банд қилган "Арал Самали" клуби футболчиларининг умумий қиймати Жанубий Судан терма жамоасидан 3 мартага қимматроқ.

Африка жамоаси ФИФА рейтингида 167-ўринга жойлашган. Тасаввур қилиб олишингиз учун айтамиз: Бермуд ороллари ва Непал даражасидаги рақиб. 

Тўғри, пандемик вазият ЎФАнинг ишини қийинлаштиргани бор гап. Лекин, "Арал Самали"дан кучсизроқ терма ёки "Ал Ваҳда" клуби билан ўртоқлик учрашуви ўтказиш учун катта харажат қилиб, Дубайга бориш шартмиди? Ундан кўра, Фарғонадаги ҳоким кубогига қатнашиш маъқул эмасми? Ҳам арзон тушади, ҳам рақибларнинг даражаси кучлироқ...

П/С. Муаллиф фикри таҳририят нуқтаи назарига мос келмаслиги мумкин.