Темурхўжа Абдухолиқов: "Тўпурар бўлишни истайман, аммо биринчи навбатда жамоамнинг ютуғи муҳим"

- Учрашув биринчи голга қадар қийин бўлди. Гол уриб олганимиздан сўнг рақиб олдинга ўтишни бошлади ва табиийки биз учун рақиб жарима майдончаси олдида бўш ҳудудлар пайдо бўлди. Агарда биринчи бўлимда гол урмаганимизда бизга янада қийин бўларди деб ўйлайман. Жамоамиз учун бу баҳс жуда яхши руҳда кечди ва ОЧЛ доирасидаги "Сепахон"га қарши беллашув олдидан бу ғалаба биз учун айни муддао бўлди. Бу ўйин "Сепахон" билан бўладиган жиддий учрашув олдидан ўзига хос тайёргарлик вазифасини ўтаб берди. Чиройли ғалаба тақдим этган хуш кайфият бизга келгуси ўйинда жуда қўл келиши мумкин. Тўғри, жамоамиз чиройли ўйнади ва йирик ҳисобда ғалаба қозонди. Аммо ўйин камчиликларсиз бўлмайди. Ҳар битта учрашувда барибир ўзига яраша хатолар ва камчиликлар кузатилади. Биз булар устида иш олиб борамиз. Ўйлашимча, иккинчи голдан сўнг жамоамиз бироз ўйинни рақибга топшириб қўйгандек бўлди. Хотиржамлик натижасида бироз бўшашдик. Энди "Сепахон" билан бўладиган баҳсда жиддий тайёргарлик кўрамиз. Тўпурарлик? Ҳар мавсум олдидан ҳужумчи тўпурар бўлишни ўз олдига мақсад қилиб қўяди. Жумладан мен ҳам. Кўп нарса эса омадга боғлиқ. Баъзи пайтларда гол уришда омад очиқчасига юз угириши мумкин. Балки аксинча, осон бўлмаган вазиятда гол уришни уддалайсан. Мен бу мавсумда яхши ният қилмоқдаман ва тўпурар бўлишга ҳаракат қиламан. Нафақат тўпурарлик, балки жамоавий ютуқ мен учун муҳим аҳамият касб этади. Муҳими жамоамиз чемпионликни қўлга киритса етарди.