Темур Кападзе: “Фақат яхши тилакларим сизларга”

Темур матбуотни имкон қадар тез-тез кузатиб боради. Биз учун сайтимиз борасидаги фикрлари билан қизиқдик.

-   Фурсатдан фойдаланиб, кўпчилик қатори мен ҳам championat.asia сайтининг туғилган куни билан табриклайман. Ўйлайманки, мана шу ўтган уч йил ичида сайт жуда кўп ишларни амалга оширди. Ўзининг катта аудиториясига эга бўлди ва янгиликларни тез-тез бериб туриши билан бошқалардан ажралиб турди. Сайт шаънига айтадиган гапларим фақат яхшиликлардан иборат. Сайтнинг ўқувчилари қанча кўпайса, бундан жудаям хурсанд бўламан.
 
-   championat.asiaнинг бошқа сайтлардан фарқи нимада?
-   Фарқи бор, албатта. Аввало сайтнинг кўриниши ўзгарди. Тўғриси, бошида кўника олмай юргандим, кейин эса ўрганиб кетдим. Менимча, сайт энди қулайроқ шаклга келтирилди. Бундан ташқари, сайтнинг рус тилидаги версияси ҳам жуда кўпчиликка маъқул келяпти. Орамизда русча ўқийдиганлар ҳам кўп ва бу улар учун айни муддао.
 
-   Сиз учун хабарларни ўқиш қизиқми ё хабарлар тагида чиқадиган мухлислар фикриними?
-   Тўғрисини айтсам, фикрларни унчалик ўқимайман, асосан хабарларни ўқиш билан чекланаман. Негаки аксарият фикрлар шунчаки ёзилади. Баъзи мухлислар эса ҳатто қўпол сўзларни ишлатиб бир нималарни ёзишади. Шу боис бунақа гапларни ўқигим келмайди.