Суҳроб Неъматов: “Навбаҳор”га узоқдан гол урганим биринчи маротаба юз бераётгани йўқ”

 Неъматов билан шу хусусда суҳбатлашганимизда, бу тарзда гол уриши биринчи маротаба юз бермаётганини айтиб ўтди. 

- Биласизми бу тарзда гол уришим олдин ҳам содир бўлганди - – дея гап бошлади Суҳроб Неъматов. Аниқроғи “Қурувчи” (ҳозирги “Бунёдкор” – И.Р ) олий лигага чиққан илк йилида “Бухоро” билан ўйнаганди. Ўринсобарлар баҳсида майдонга тушиб, худди шу тарзда майдон марказидан туриб зарба берган холда, рақиб дарвозасини ишғол этганман. 

- “Навбаҳор”га урган голингиздан олдин буни қанчалик ҳис этгандингиз?

- Зарба беришдан олдин, “Навбаҳор” посбонига эътибор қаратдим. Олдинроққа чиқиб кетганини кўргач, марказга тушиб, ҳимоячимиздан тўпни қабул қилиб олдимда, таваккал қилиб, зарба бердим. Тўғриси, буни олдиндан аниқ билганман дея олмайман. Шунчаки ўз омадимни синаб кўрдим. Голга мухлислар ва мутахассислар баҳо бергани маъқул. Афсуски ушбу голим жамоамга фойда келтирмади. Шунинг учун ҳам унчалик татимади. 

- “Бухоро”ни таркиб жиҳатдан бошқаларга солиштирадиган бўлсак, чакки кўринмаяпти. Лекин жамоанинг ишлари юришмаяпти. Бунга нима сабаб бўлмоқда деб ҳисоблайсиз?

- Очиғи, ўзимиз ҳам тушунмаяпмиз нима бўлаётганига. Ғалаба учун иштиёқ етарли. Лекин натижа бўлмаяпти. 

- Иккинчи давра ҳам “Бухоро” учун жуда омадсиз бошланди...

- Тақвим ҳам биз учун ноқулай келгандек. Дастлабки икки турни сафарда водий жамоаларига қарши ўтказдик. Кейин ўз майдонимизда “Насаф”ни қабул қилдик. Бизга битта ғалаба керак. Кейин ҳаммаси яхши бўлиб кетади. 

- Давралар оралиғида таркибга янги келиб қўшилган футболчилар қай тарзда жамоани кучайтиришга эришди деб ҳисоблайсиз?

- Асқаралиев, Попович, Ражабов, Нарзуллаев, Исроилов, Бақоев каби янги келиб қўшилган ўйинчиларнинг тажрибасига шубҳа йўқ. Улар жамоага ёрдам бериш мақсадида келган. Менимча янгиларнинг фойдаси катта бўлади. 

- Жамоанинг ички муҳити қандай?

- Жуда яхши.

Исломбек Рустамбеков суҳбатлашди.