Шаҳбоз Беғамов: "Ойбек Бозоров Осиё чемпионати кашфиётларидан бирига айланиши мумкин"

"Янги йилдан кейин январда ҳар сафар Осиё чемпионати бўлишига кўникиб қолди одам. Икки йил аввал Хитойда ёшлар ўртасидаги Осиё чемпионати ўтказилганди. Ўтган йил БААдаги Осиё Кубоги ва бу гал Олимпиада йўлланмаси ўйналгани учун ҳам қадри баланд Осиё чемпионати бошланди. Таиланддаги мусобақада Олимпия терма жамоамиз эртадан муҳим йўлга тушади. Аввал ҳам айтганимдек, негадир ишонч юқори ва хотиржамман. Ҳа, гуруҳ кучли, бу ҳақида ортиқча гапиришга ҳожат йўқ. Лекин бизнинг жамоа ўша кучли гуруҳнинг асосий “бўри”ларидан бири. Рақибларимиз ичида энг кучлиси — Жанубий Корея. Кейингиси — Хитой. Фикримча, нисбатан кучсизи — Эрон.

Эронда мураббий қўнимсизлиги натижасида ҳам ўйин яхши эмас. Тайёргарлик ҳам идеал эмас. Хитой яхши жамоа, лекин қўрқинчли эмас. Жанубий Корея зўр, ҳа. Қувонарлиси, биз улар билан охирги турда, эҳтимол, барча масала ҳал этилгач ўйнармиз. Шу тарафлама бу яхши.

Зўр авлод, квалификацияси юқори футболчилар жамланмаси асосий таркиб борасида мураббийда яхши маънодаги “бош оғриқ”ни тақдим этиши аниқ. Ғаниев, Тўхтасинов, Абдихолиқов, Яхшибоев каби футболчилар чинакам етакчи бўлиши керак. Ойбек Бозоров эса мусобақа кашфиётларидан бирига айланиши мумкин. Эрон билан ўйинда ишончли ўйин ҳамда йирик ғалаба кутяпман. Менимча, қийналмаймиз. Омад, йигитлар!" - деб ёзди Шаҳбоз Беғамов.