Рўзиқул Бердиев: “ОЧЛга муносиб ҳозирлик кўрамиз”

Куни кеча Россия сафаридан қайтган жамоамиз устози бу ҳақда қуйидагиларни гапириб берди.

-Европа қитъасининг клублар ўртасидаги энг нуфузли мусобақасини бевосита кузатиш учун ушбу учрашувга бордим, -дейди Рўзиқул Саъдуллаевич. – Мақсадим ЕЧЛ учрашувини томоша қилиш билан бирга ўша ўйинда мураббийларнинг тактик ва техник услубларини оз бўлсада ўзлаштиришдан иборат эди. Сафардан ўзим учун керакли ахборотларни тўплай олдим. Учрашувдан кейин “Зенит” клуби қароргоҳига ҳам бориб, у ерда футболчилар учун яратилган шароитларга гувоҳ бўлдим. Тўғрисини айтганда, клуб базасида яратилган шароитлардан ажабланмадим. Бизда ҳам шу каби шароитлар яратилган. “Зенит”да барча ташкилий ишлар аъло даражада ташкил этилган ва професионаллар иш олиб боришига гувоҳ бўлдим.

-Куни кеча ОФК томонидан Осиё чемпионлари лигаси баҳсларида Ўзбекистон учун 3+1 тарзида ўринлар тақсимлангани маълум бўлди. Бу “Насаф”нинг янги мавсумда ОЧЛни гуруҳ босқичида бошлашини англатади...

-Албатта биз якунланган мавсумда чемпионатни совринли ўринда якунлагач, қитъа турниринг гуруҳ босқичида бошлашни ният қилгандик. Кутилгандек, ОФК томонидан юртимиз жамоалари учун 3+1 тарзидаги ўринлар тақдим этилди. Бу юртимиз футболининг нуфузи ОФК томонидан юқори баҳоланганидан далолат беради. Янги мавсумда ушбу турнирда қатнашадиган барча клубларимизга омад тилайман. Ўз ўрнида “Насаф” футболчилари ҳам ушбу баҳсларга муносиб ҳозирлик кўришади. Ўтган ҳафтада жамоамиз аъзолари Тошкентда тиббий кўрикдан ўтишди. Кўрикдан эртароқ ўтишимизнинг сабаби сафимиздаги жароҳат олган айрим футболчиларимизга аниқ ташхис ҳам қўйилади. Янги йил олдидан ташкил этиладиган йиғинмизга улар тайёр ҳолатда келишади.