Раҳимжон Давронов: "Машъал" кучли бешликка киришга ҳаракат қилади"

Муборакликлар бош мураббий Виктор Жалилов қўл остида машғулотларни олиб боришмоқда.

Таркибда ҳозирча катта ўзгаришлар йўқ. Фақат, ўтган мавсумда ижарада ҳаракат қилган футболчилар жамоа ихтиёрига қайтган холос. Ҳусусан 2019 йилда ижара асосида “Бухоро” клубида тўп тепган дарвозабон Раҳимжон Давронов ортга қайтди. Олимпия терма жамоаси билан Осиё чемпиони бўлган иқтидорли посбон тайёргарлик ва йиғин ҳақида фикрларини билдириб ўтди.

“Тайёргарлик режа бўйича кетмоқда. Кунига икки маҳалдан машғулотлар олиб боряпмиз. Иккита назорат учрашуви ҳам ўтказишга эришдик, “Бухоро” ва “Қизилқум” билан. Ҳа, янги мураббий ҳақида бирор нима дейишим қийин. Ҳозирча машғулотлар анча қизиқарли тус олган. Чемпионат бошланса кўп нарсага ойдинлик киритиб олишимиз мумкин. Мазкур йиғин доирасида яна ўртоқлик учрашувлари ўтказилиши режалаштирилган. Тўғри, трансферлар ойнасида оқсаяпмиз. Лекин, ўзимизнинг маҳаллий футболчиларимиз ўзларини кўрсатишга тайёр туришибди. Кучли бешликка киришга ҳаракат қиламиз”,- деди Давронов.

Абдулазиз Искандаров ёзиб олди