Қадри топталган иқтидор соҳиби

8 октябрь куни "Арсенал" Европа Лигаси-20/21 ўйинлари учун қайдномани эълон қилганди, 21 октябрда эса Лондон клуби Англия Премьер-Лигасига киритилган ўйинчилар  рўйхатини тақдим этди. Клубнинг энг кўп ҳақ тўланадиган футболчиси — Месут Озил ҳеч биридан ўрин олмаган. Уйғурларнинг оммавий ҳимояси, ўтказилган ўйинлар учун молиявий бонуслар, иш ҳақини камайтиришдан бош тортиш — айнан шу кабилар "Арсенал" раҳбарияти ва ярим ҳимоячи ўртасида низо келиб чиқишига сабаб бўлди.

"Бу ҳақиқий футбол қарори бўлди. Унинг олдида виждоним тоза, сабаби унга нисбатан адолатли эдим. Биз бир-биримизни тушунардик ҳамда бир-биримиздан нима кутиш кераклигини яхши билардик. Ҳамма қатори унинг ҳам имкониятлари юқори эди. Учтагина ўйинчини қайдномадан ташқарида қолдирганимдан афсусдаман, бироқ ноқулай ҳолатлардан қочиш учун барча нарсага ҳисобга олишга ҳаракат қилдим. Месут билан боғлиқ вазиятга келсак, бундан хотиржамман, чунки клубга келганимдан буён у билан доим очиқчасига гаплашганман. У ўзини қандай тутгани бу ерда унчалик муҳим эмас. Бу менинг қарорим", — дея Озилнинг таркибга киритилмаганига изоҳ берди "Арсенал" бош мураббийи Микель Артета.

Озилнинг шартномаси муддати шу мавсум сўнгида якунига етади. Катта эҳтимол билан Месут "Арсенал" сафида бошқа ўйнамайди, шунинг учун унинг "Арсенал"даги фаолиятига қайсидир маънода хулоса ясаш мумкин, назаримизда.

2013/2014 йилги мавсум

2013 йил 2 сентябрь. Дедлайн. Трансфер ойнаси ёпилишига саноқли кунлар қолди. "Арсенал"нинг ашаддий мухлислари бу кунни такрорланмас кун сифатида эслаб қолишган. Клуб ва ниҳоят 42.5 млн фунтга Месут Озилни сотиб олди ва трансфер рекордини янгилади. Бу "Арсенал" учун ақлбовар қилмас трансфер ҳамда "Реал Мадрид" учун катта йўқотишдек кўринганди. Футболчи клубдан кетганига Криштиану Роналду қуйидагича муносабат билдирган эди: "Озилнинг кетиши мен учун даҳшатли янгилик бўлди. У рақиб дарвозаси ёнидаги ҳаракатларимни ҳаммадан кўра яхшироқ тушунарди. Учрашув натижасини якка ўзи ҳал қила оладиган ўйинчини "Реал" қандай қилиб сотишга рози бўлганига ҳали ҳам тушуна олмаяпман. Бу трансфердан жуда жаҳлим чиқди. Шак-шубҳасиз Озил мен учун "Реал"даги энг яхши футболчилар қаторида эди".

Арсен Венгер эса Месут ҳақида шундай деган: "Озилнинг ўзига хос маҳорати бор. У доим майдонда жуда тез, тўғри қарорлар қабул қила олади. Мен унинг дриблингини Зиданнинг дриблинги билан таққослаган бўлардим. Месут ҳужумга кўпроқ эътибор қаратади".

14 сентябрь куни Месут Премьер-Лига доирасида "Сандерленд"га қарши баҳсда "Арсенал" сафида дебют қилди. Ўшанда канонирлар 3:1 ҳисобида ғалаба қозонган, Озил эса 11-дақиқада Оливье Жируга голли узатма берганди. Кейинги "Сток Сити" билан учрашувда эса Месут голли паслар бўйича хет-трик қайд этди.

2 октябрь куни Чемпионлар Лигаси доирасида "Наполи"га қарши ўйинда Озил канонирлар сафидаги илк голини уришга муваффақ бўлди. Ўша баҳсда "Арсенал" 2:0 очко билан ғолиб бўлганди.

Озил қисқа муддат ичида "Арсенал"нинг асосий юлдузи ва ҳужум етакчисига айланди, аммо фақатгина жамоа яхши ўйнаган пайтгача шундай бўлди. Мавсум давомида Месутнинг ўйинига нисбатан танқидлар кўп бўлди, лекин буни немиснинг туманли альбиондаги дебют мавсуми экани билан оқлаб кетишди. "Арсенал" учун ўша мавсумнинг асосий натижаси — Англия Кубогидаги ғалаба бўлди. Канонирларнинг 9 йил ичидаги илк соврини. Ўйиндан кейинги нишонлаш байрамида Озил мухлислар яхши кўрадиган "Арсенал" иборасини айтди: "YA GUNNERS YA!!!"

Озилнинг бутун мавсумдаги статистикаси: 40 ўйин, 7 гол, 14 голли узатма.

2014/2015 йилги мавсум

Месут бу мавсумни Жаҳон чемпиони сифатида бошлади. У 2014 йил октябрь ойи ўрталарида жароҳат олди ва 4 ойга сафдан чиқди. Январда эса сафга қайтди. Кейин Озил АПЛ учун заиф экан деган фикр оммалашиб кетди. Унинг ўйин ҳаракатлари айниқса, кучли олтиликка қарши ўйинларда қаттиқ танқид остига олинарди. Немис ҳимояланишда жамоага деярли ёрдам бермасди, баъзида эса ўйинда йўқолиб қолганга ўхшарди. Шу сабабли уни "кўринмас одам" деб ҳам чақиришган. Омар Момани эса унга атаб қуйидаги карикатурани чизганди:

Ўша мавсумда Озил кўпинча чап вингер позициясида майдонга тушарди, унинг севимли — марказий ҳужумкор ярим ҳимоячи жойини эса Санти Касорла эгаллаганди. Арсен Венгер бу ғояни Йоахим Левдан олганди. Германия ғалаба қозонган мундиалда Месут чап қанотда ўйнаган. Бу немиснинг энг яхши сифатларини қамраб олганди ва эҳтимол шунинг учун унинг самарадорлиги пасайиб кетгандир?!

Ўша йилги Чемпионлар Лигасида "Арсенал" турнир 1/4 босқичига чиқиш учун яхшигина имконияти бўлган, чунки рақиби "Монако" эди. Бироқ "Арсенал" уйда 1:3 ҳисобида мағлуб бўлган, меҳмонда эса "монегасклар"ни 0:2 ҳисоб билан ютган. Аммо сафардаги гол қоидасига кўра канонирлар кейинги раундга ўта олмаганлар. Лекин Англия Кубогида "Арсенал"ни яна ғалаба кутиб турганди. Жамоа финалда "Астон Вилла" 4:0 ҳисоб билан мағлуб этганди.

Озилнинг бутун мавсумдаги статистикаси: 32 ўйин, 5 гол, 9 голли узатма.

2015/2016 йилги мавсум

Бу мавсум Месут Озил учун перфоманс бўлди. Аниқроғи, мавсумнинг биринчи ярми.

7-тур ўйинида Озил мавсумдаги учинчи голли узатмасини берди, кейинги 12 турда эса яна 14 ассист бериб, 3та гол уришга эришди. Бу бутун вақт давомидаги энг яхши Месут Озил эди. Ўшанда Озил АПЛнинг кетма-кет 7 учрашувда голли пас бериб, ажойиб натижа ўрнатди. Мавсумнинг дастлабки 19 баҳсида Месут 16 голли узатма берди, ўшанда Тьерри Анрининг рекордигача (бир мавсумда 20 ассист) бир неча қадам қолганди. Шу сабабли қолган 19 ўйинда Озил камида яна 7-8 ассист беришига шубҳа йўқ эди. Франсис Коклен ва Санти Касорла жуфтлигини алоҳида эътироф этиш зарур. Сабаби бу икки футболчи борлиги учун ҳам Озил майдон марказида тўп учун курашиш ҳақида ортиқча ўйламаслиги мумкин эди.

Бироқ мавсумнинг иккинчи ярми "Арсенал" учун ҳам, немис учун ҳам омадсиз келди. Жамоа 19 учрашувда атиги 8 марта ғалаба қозонди, Озил эса 17 баҳсда 3тагина голли пас берди. Таъкидлаш лозимки, Месутнинг ўйини ёмонлашгани йўқ, ҳамма гап унинг шерикларида эди. Оливье Жиру кетма-кет 12 ўйинда гол уролмади, Алексис Санчес жароҳат олди ва тузалиб, оптимал формага қайтиши учун анча вақт кетди. Бироқ асосий муаммо — Санти Касорланинг жароҳати эди, шу туфайли испан мавсумнинг кейинги ярмида атиги битта ўйинда майдонга тушди холос. Германиялик тўп билан кўпроқ муомалада бўлиш учун орқароққа қайтишга мажбур бўларди.

32-турда Озил 135та голли вазиятлар яратиб бериб, АПЛда янги рекорд ўрнатди.

Шундай ажойиб мавсум бўлганига қарамай, Месут ҳеч қандай индивидуал мукофот олмади. Ҳаттоки, бир марта ҳам лигада ойнинг энг яхши ўйинчиси сифатида эътироф этилмади, АПЛ-15/16 мавсуми терма жамоасига унинг позициясига Димитри Пайе қўйилди. Мавсумнинг энг яхши ўйинчиси совринига Месут номзоди қўйилди, аммо мукофот Рияд Марезга насиб этди.

АПЛнинг ўша йилги мавсумида "Арсенал" 10 очкога "Лестер"дан ортда қолган ҳолда иккинчи ўринни эгаллади. "Тулкилар" ўша йил чемпион бўлишлари учун уларга 81 очко етарли бўлганди. Ўша рақиблари натижалари пасайиб кетгани туфайли, "Арсенал" чемпионлик поғонасига жуда яқин келган мавсумларидан биридир. Мавсум бошланишидан аввал "Арсенал" гарчи ҳужум позициясини кучайтиришга муҳтож бўлганига қарамай, бирорта ҳам майдон ўйинчиси сотиб олмади. Эҳтимол, Месутнинг ёнида Оливье Жирудан кўра самаралироқ форвард бўлганида, биз "Лестер"нинг ажойиб эртагига гувоҳ бўлмаган бўлармидик?! Чемпионлар Лигаси 1/8 босқичида "Арсенал" ҳеч бир имкониятсиз "Барселона"га мағлуб бўлганди.

Озилнинг бутун мавсумдаги статистикаси: 45 ўйин, 8 гол, 20 голли узатма.

2016/2017 йилги мавсум

2016/2017 йилги мавсум Озил учун голлар бўйича энг самаралиси бўлди. "Эмирейтс"да бўлган Чемпионлар Лигаси доирасидаги "Лудогорец"га қарши баҳсда рақиб дарвозасига фаолиятидаги илк хет-трикини қайд этди. Кейинги турда эса "Лудогорец" дарвозасига жуда чиройли гол урди. Қуйидаги буни яна бир бор кўришингиз мумкин:

"Озилнинг Чемпионлар Лигасидаги голи жуда ажойиб бўлганди. Бундай ўзгача бир ҳис туфайли, этим жимирлаб кетти. Баъзида футбол ҳақиқатдан ҳам санъат туридек туюлади", — деган эди Эрик Кантона.

Бу "Арсенал" гуруҳдан чиқишига ёрдам берган, бироқ у ерда жамоани "Бавария" кутиб турганди. Ўшанда икки ўйин ҳисоби бўйича шармандали натижа қайд этилган: 10:2. Шундан сўнг Озил "Арсенал"дан кетади деган миш-мишлар тарқаганди. Арьен Роббен гол ураётган паллада мана Озил нима қилаётганди:

Премьер-лига 6-турида Озил "Эмирейтс"да Санчес билан биргаликда "Челси"ни янчиб ташлаганди. Мавсум мобайнида Озил-Санчес жуфтлиги янада яхшироқ ҳаракат қилиб, бир-бирини тўлдира бошлади. АПЛ ўша мавсумини чилилик 35та, немис эса 18та голли пас билан якунлади. Ўша мавсум Асексис Месутга АПЛда 8тадан 5та ассист етказиб берди.

"Арсенал" 75 очко тўплади ва турнир жадвалида 5-ўринни эгаллади ва 20 йилда илк бор Чемпионлар Лигасига чиқолмади. Асосий муаммо жароҳат олган Санти Касорланинг ўрнини ҳеч ким боса олмагани эди.

"Озил — мунтазам равишда тўпга эгалик қилишни истайдиган ўйинчи. У бундай вазиятда ажойиб ўйнайди. Касорла сафдан чиққани Месутга қаттиқ зарба бўлган, чунки у босим остида тўпни олиб чиқиб кетиши мумкин. Агар тўп Озилга вақтида етиб келса, у йўқ жойдан ҳам голли вазият яратиб бериши мумкин", — дейди Арсен Венгер.

Бироқ омадсиз мавсум бўлганига қарамай, канонирлар ўз мухлисларини Англия Кубогидаги навбатдаги ғалаба билан хурсанд қила олдилар. Финалда "Челси"ни 2:1 ҳисобда мағлуб этдилар.

Озилнинг бутун мавсумдаги статистикаси: 44 ўйин, 12 гол, 14 голли узатма.

2017/2018 йилги мавсум

2017/2018 йилги мавсум "Арсенал" мухлислари учун был многообещающим. Ёзда Александр Ляказетт жамоага келиб қўшилди ва қоғозда канонирлар ҳужумлари таҳликалидек кўринарди. Санти Касорла ҳамон жароҳатидан тузалмаганди, унинг ўрнига эса мос ўйинчи топилмаганди. Месут эса тўп билан кўпроқ муомалада бўлиш учун орқароққа қайтишга мажбур бўларди. Қишки трансферлар ойнасида Озил/Санчес жуфтлигига дарс кетди. Чилилик пул топиш мақсадида "Манчестер"га кетди, унинг ўрнига эса Лондонга Генрих Мхитарян келди. Шунингдек, қишда "Арсенал"нинг ҳозирги етакчиси Пьер-Эмерик Обамеянг сотиб олинди. "Арсенал" ҳужуми кўринишидан анча кучлига ўхшарди.

2018 йил 1 февраль куни Месут "Арсенал" билан янги шартнома имзолади ва унга кўра канонирларнинг энг кўп ҳақ тўланадиган ўйинчисига айланди. Бугунги кунда ҳам унинг маоши жуда юқори: ҳафтасига 350 минг фунт (солиққача). Ўшанда "Арсенал"нинг барча мухлислари хурсанд, футбол оламидагилар эса "Арсенал" бунча пулни қандай топганига ҳайрон эди. Гап сўзларга қараганда, Венгер ҳамда "Арсенал"нинг ўша вақтдаги спорт директори Иван Газидисга ўша йили Озил/Санчес жуфтлигидан фақат битта футболчининг маошини шунчага ошириш учун рухсат беришган экан. Қизиқ, гап ўшанда иш чилилик фойдасига ҳал бўлганида, ҳозир вазият қандай бўлган бўлар экан-а?!

"Мен юрагимга қулоқ солдим. Доим айтганман, мен бу ерда ўзимни худди уйимдагидек ҳис қиламан. Мен янада юқори чўққиларни забт этишим учун куч-ғайратим етарли. Бир кун "тўпчи" — доим "тўпчи", — деб ёзган эди Озил янги шартнома имзолаганидан сўнг инстаграм саҳифасига.

Мавсумдаги асосий мақсад Европа Лигасида ғалаба қозониш эди, бироқ канонирлар Мадриднинг "Атлетико"сига ярим финалда мағлуб бўлди. Месут фақатгина 1/16 финалдан курашга қўшилди, сабаби "Арсенал" ортиқча муаммоларсиз гуруҳдан биринчи ўрин билан чиқди. Мавсум сўнгида Озилнинг бели билан боғлиқ муаммолар юзага келди. Натижада АПЛ 32-туридан бошлаб германиялик майдонда туша олмади. "Арсенал" яна бир бор Чемпионлар Лигасисиз қолиб кетди. Қолаверса, бошқа бирор соврин ҳам юта олмади. Арсен Венгер эса истеъфога чиқди.

Озилнинг бутун мавсумдаги статистикаси: 35 ўйин, 5 гол, 14 голли узатма.

2018/2019 йилги мавсум

Озил "Aрсенал" ихтиёрига ёмон кайфият билан қайтди. Ёзда футболчи Германия термаси билан ЖЧда омадсиз иштирок этди ва мухлислар бунда Месут Озилни айблашди. Футболчи танқидларни асоссиз деб ҳисоблади ва хафа бўлиб, термадаги фаолиятини якунлади. 2018/2019 йилги мавсум "Aрсенал" учун Унаи Емери жамоага келиши билан тарихда қолди. Aйнан ўша палладан Месутнинг ўйинидан кўра, мураббий ва раҳбарият билан муаммолари ҳақида гапиришмоқда.

Озилнинг Эмери билан муносабати ғалати тус олди. Германиялик мавсум давомида кўп марта ҳеч бир сабабсиз қайдномага киритилмади, баъзида эса шунчаки захирада қолдирилди. Миш-мишларга қараганда, Унаи ва Месут мавсум аввалида машғулот пайти уришиб қолган эмиш. Эмери, Венгердан фарқли ўлароқ, футболчилардан ўзини тўлиқ кўрсатиб беришини талаб қиларди. Испан барча ўйинчиларни ҳужум қилишга мажбур қиларди, жумладан Месутни ҳам.

2018 йил 15 октябрь куни Озил 30 ёшга тўлди. Шу муносабат билан Opta жуда қизиқарли статистика тайёрлади. 01.07.2006 йилдан буён Европа топ-5 лигаларидан Месутдан кўпроқ ҳеч бир футболчи шерикларига вазият яратиб бермаган экан (Озил — 1033 марта). Бу факт германиялик кучли ўйинчилардан бири эканини яна бир бор эслатиб қўйгандек бўлди.

9-тур ўйинида Месут сардорлик боғичини олди ва "Эмирейтс"да гол+пас қилиб, амалда бир ўзи "Лестер"ни таслим этди. Келаси 3 учрашувда эса Озил яна жамоа сардори бўлди ва мураббий ишончини қозонгандек кўринарди. Бироқ навбатдаги 12 турда Месут атиги 2 марта асосий таркибдан, 2 марта захирадан майдонга тушди.

Эмери ва Озил муносабатининг авжига чиққан нуқтаси Европа Лигаси финали бўлди. Бу канонирлар учун жуда муҳим учрашув эди, сабаби улар лигада 5-ўринни эгаллаб, Чемпионлар Лигасига чиқолмагандилар. "Арсенал" ўшанда "Челси"га йирик ҳисобда мағлуб бўлган, Месут эса 78-дақиқада алмаштирилган. Ўйинчининг бундан жаҳли чиқиб, Унаи Эмерига қўполлик билан жавоб қайтарган. Туркиянинг "Hurriyet" газетаси ёзишича, ўшанда Озил шундай деган экан: "Сен мураббий эмассан".

Озилнинг бутун мавсумдаги статистикаси: 35 ўйин, 6 гол, 3 голли узатма.

2019/2020 йилги мавсум

Мавсум бошланишидан аввал, июль охирларида Месут Озил ва Сеад Колашинац қуролланган босқинчилар томонидан ҳужумга учрашди. Бу воқеа ҳамманинг ёдида бўлса керак. Шу сабаб немис ва босниялик биринчи турни ўтказиб юборади. Иккинчи турда "Бёрнли"га қарши баҳсда эса Колашинац қайдномага киритилганди ва ҳаттоки, захирадан майдонга тушганди. Месут эса 5-турда "Уотфорд"га қарши учрашувдагина кўринди, кейин эса яна "йўқ бўлиб кетди". Эмери билан бўлаётган зиддият аста-секин кўринаётганди. Кўплаб мухлислар мураббийни ёнини олар, Месутнинг эса "ёғли" шартномасини гапиришдан тўхташмасди. Германиялик ноябрь бошидан мунтазам ўйнай бошлади, лекин худди "Арсенал" каби ёмон ўйин кўрсатарди.

Ноябрь охирларида Эмери истеъфога чиқарилди. унинг ўрнини эса Микель Артета эгаллади. 5 декабрь куни 15-турнинг "Брайтон"га қарши учрашувида Озил мавсумда биринчи голли узатмасини берди — германиялик Александр Ляказеттга голли пас берди, лекин канонирлар барибир ўша баҳсда 1:2 ҳисобида мағлуб бўлдилар. Айтганча, у пайтда Артета ҳали жамоа билан машғулотларга киришмаганди. Мураббий вазифасини Фредди Юнберг бажараётган эди.

13 декабрда Озил твиттер саҳифасида Хитойда яшайдиган уйғурларни хитойликлар қувғин қилаётганига фикр билдириб, мамлакатни айблади. Хитойликлар бунга дарҳол жавоб қайтаришди. Давлат телеканали CCTV (ХХРда АПЛ ўйинларини ёритадиган асосий телеканал) "Арсенал" ва "Ман Сити" ўйинини жонли намойиш этишни бекор қилди. Озилни барча қидириш тизимларидан ўчириб юборишди ва ижтимоий тармоқларини ҳам блоклашди. "Арсенал" эса кейинроқ "Озилнинг уйғурлар ҳақидаги гаплари — унинг шахсий фикри" деган баёнот билан мурожаат қилди.

"Менинг биринчи иш кунимданоқ Месутнинг машғулотларга бўлган муносабати ақлбовар қилмас даражада эди. Мен буни сезгандим ва ҳар бир ўйинчи мен билан нолдан бошлашини айтдим. Баҳсга тайёргарлик кўраётганимизда Месут бизнинг муҳим футболчимиз бўлишини тушунгандик", — деганди Артета декабрь охирида. Ва ҳақиқатдан ҳам, Артета қўл остида Озил ўйиннинг муҳим бўлаги бўлиб, карантингача барча ўйинларда иштирок этди.

29-тур "Вест-Хэм"га қарши учрашуви Месутнинг "Арсенал"даги охирги ўйини бўлди (ҳозирча, балки бутунлайдир). Ўша баҳсда "Арсенал" 1:0 ҳисобида ғалаба қозонди, германиялик эса 78-минутда Александр Ляказеттга голли узатма беришга муваффақ бўлди. Шундан кейин барча мамлакатлардаги футбол карантин сабаб тўхтатилди. Озил эса "Арсенал"да яна муҳокама мавзусига айланди. Ярим ҳимоячи маошининг 12,5% қисқартирилишига қаршилик кўрсатди.

"Мен агар бу зарур бўлса ва вазият очиқ бўлганида, ҳаттоки ойлик кўпроқ миқдорда камайишига ҳам рози бўлардим. Бунинг ўрнига ҳеч нимани муҳокама қилиб ўтирмай, охирги паллада бизга шундай бўлаётганини маълум қилишди. Бундай ҳолатда сиз кўпроқ маълумотга эга бўлишингиз ва пулларингиз қаерга кетишини билишга ҳаққингиз бор. Биз эса ҳеч нимани билмай туриб, қароримизни маълум қилишимиз зарур", — дейди Озил.

Карантиндан сўнг Озил бирорта ўйинда ҳам майдонга тушмади, Микель Артета эса қайдномага фақатгина энг яхши ўйинчилар киритилади деди. Мавсум сўнгида "Арсенал" Англия Кубогини қўлга киритди, Месут Озил ўйинни телевизор орқали кўрди.

"Менинг позициям тушунарли. Шартноманинг сўнгги кунигача шу ерда қоламан ва клуб учун боримни беришга тайёрман. Бунга ўхшаш вазиятлар мени синдира олмайди, улар менга фақатгина куч беради. Аввал ҳам юқори даражага қайта олишимни кўрсатиб қўйгандим, ҳозир ҳам буни исботлай оламан", — дейди Месут августда "The Athletic"га берган интервьюсида.

Озилнинг бутун мавсумдаги статистикаси: 23 ўйин, 1 гол, 3 голли узатма.

Баъзи хулосалар

Хўш, Месутнинг "Арсенал"даги фаолиятини муваффақиятли деб бўладими? Бу саволга аниқ жавоб беришнинг иложи йўқдек. Озил сўнгги икки мавсумни омадсиз ўтказди, яъни футбол майдонида машҳурликка эришиб эмас, балки сиёсий аренада муҳокамаларга кўпроқ сабаб бўлди.

Венгер қўл остида Озилнинг роли, унга қўйиладиган талаблар умуман бошқача эди. Эмери ва Артета даврларига қараганда унга бу талаблар кўпроқ мос келарди. Озилни бир сўз билан "дангаса ўйинчи" дейиш мумкин, у ўзини мажбурлаб ҳимояга қайтади. Лекин у доим шундай бўлган, фақатгина биз "Вердер"да бошқа Месутни кўрганмиз.

Муаммо шундаки, Озилдан у амалга оширишга қодир бўлмаган нарсаларни талаб қилишяпти. Венгер даврида Озил ҳимоявий ҳаракатларда фаол бўлмасди, бунга у билан бирга ўйнаётган ярим ҳимоячилар ҳам имкон яратарди. Тўпни олиб қўйиш ва уни ҳимоядан чиқариш ҳақида Месут бош оғритиши шартмасди. Ҳозир Томас Партининг ортида германияликнинг ўйинини кўриш анча қизиқарли бўларди. Балки, Озилнинг маоши бу қадар катта бўлмаганида, мухлислар унга бошқачароқ муносабатда бўлишармиди?!

Аммо Месут "Арсенал"га келганидан сўнг жамоа яна совринларни қўлга кирита бошлади. Ҳа, бу шунчаки Англия Кубоги-ку дерсиз, лекин 9 йил давомида фақат умид қилиб яшаган канонирлар мухлислари учун бу ажойиб натижа эди. Озил узоқ йиллар мобайнида "Арсенал"нинг илк ҳақиқий топ-трансфери бўлди. Месут клубга дунёнинг энг яхши ўйинчиларидан бири мақомида келган. Шу сабабдан ҳам канонирларнинг баъзи мухлислари шундай ўйинчи муҳим турнирлар қайдномасига киритилмаётганидан ҳайрон бўлишса, бошқа фанатлар эса Артетанинг қарорини ҳурмат қилиб, унинг фикри тўғри деб маъқуллашмоқда. Месут ҳозир 32 ёшда ва фаолиятини қайтадан бошлаши учун энди бироз кеч. Шунингдек, германиялик "дангаса футболчи" эканини ҳисобга олсак, Месут "Арсенал" билан шартномаси муддати якунига етганидан сўнг, футболчилик фаолиятига ҳам нуқта қўйиши ҳеч гапмас. Буёғини энди вақт кўрсатади.

Озилнинг "Арсенал"даги умумий статистикаси:

АПЛ: 184 ўйин, 33 гол, 58 голли узатма.
Чемпионлар Лигаси: 28 ўйин, 7 гол, 6 голли узатма.
Европа Лигаси: 19 ўйин, 2 гол, 6 голли узатма.
Англия Кубоги: 16 ўйин, 2 гол, 6 голли узатма.
Лига Кубоги: 5 ўйин, 1 голли узатма.

Нозима Зарипова таржимаси