Янги келишувга кўра, клуб ҳар йили тахминан 100 миллион евро олади — бу ҳозирги тўловлардан (йилига 60 миллион евро) сезиларли даражада юқоридир.
Музокаралар Луис Энрике қўл остидаги ПСЖ 2024/2025 йилги мавсумда УЕФА Чемпионлар лигасида ғолиб чиққанидан сўнг бошланди. Клуб президенти Нассер Аль-Хелайфининг топшириғига биноан раҳбарият 1989 йилдан бери парижликлар билан ишлаб келаётган техник ҳамкор билан янги шартларни ишлаб чиқишга киришди. Шу билан бирга, амалдаги шартнома 2032 йилгача мўлжалланган бўлиб, янги битим у тугашига олти йил қолганда имзоланади.
Янги шартларни ҳисобга олган ҳолда ПСЖ энг сердаромад ҳамкорлик шартномаларига эга клублар қаторига киради. Таққослаш учун: "Барселона" 2024 йилнинг ноябрь ойида Nike билан ҳамкорликни 2038 йилгача узайтирган эди; Испания ОАВларининг хабарига кўра, битим суммаси тахминан 1,7 миллиард еврони ташкил этган.
