ПРО-Лига, “А” гуруҳи. 3-турда энг кўп мухлис Самарқандда

Агарда ўйиннинг жозибаси юқори бўлса, стадионга албатта ишқибозларнинг ташрифи ҳам ортади. Ўзбекистон Профессионал футбол лигаси томонидан томошабинларни миллий чемпионат баҳсларига қизиқтириб, уларни жалб этиш бўйича бир қатор ташкилий ишлари олиб борилаётганига ҳам гувоҳ бўлмоқдамиз. Аммо тан олиш керакки, ҳозирча ПРО-Лига ўйинларида мухлислар ташрифи у қадар кўп бўлаётгани йўқ.

Поёнига етган 3-турнинг 4та ўйинига жами 20763 нафар ишқибоз кирган. Ҳар бир учрашувга ўртача 5 190та томошабин демакдир.

Ушбу кўрсаткич, ҳозирча жорий йил ҳисобидан ПРО-Лигада энг юқори натижа бўлиб турибди.

Энг кўп томошабин кузатган ўйин “Динамо” – “Машъал” (0:1) баҳси бўлди. Самарқанддаги “Динамо” стадионида кечган ўйинни 13250 (!) нафар мухлис бевосита кузатиб борган. Бундай кўрсаткич айни дамда Суперлиганинг айрим баҳсларида ҳам кузатилмаяпти. Жума оқшомида кечган баҳсга 13250 та мухлис кирганига сабаблардан бири ўйинни кеч соат  20:00да бошланганлиги ҳамда бу баҳсдан аввал “Динамо” – “Хўжанд” (халқаро ўртоқлик ўйини) учрашуви бўлиб ўтгани ҳам мухлисларга қулайлик туғдирган бўлиши аниқ. Бизнингча ушбу кўрсаткич кейинги турларда бошқа такрорланмаса керак. Яна ким билади дейсиз.

3-турда энг кам мухлис Ҳаққулободда қайд этилди. Норин” – “Истиқлол” (0:1) учрашувига 1156 нафар томошабин ташриф буюрди холос. Ҳозирча Вали Келдиев бошқарувидаги “Норин” жамоаси чемпионатда ғалаба қозона олмаяпти. Балки шунинг учун бўлса керак, мухлисларнинг стадионга ташрифи кескин пасайиб кетгани.Чунки яхши биламиз, олдинги йиллари ҳаққулободлик мухлислар бу борада етакчилик қиларди.

Томошабинлар ташрифи кимда қандай?  

“ОРОЛ” – “СУРХОН” - 1:4 (0:1).
Нукус шаҳри. “Турон” стадиони. 1821 томошабин.

 “НОРИН” – “ИСТИҚЛОЛ” - 0:1 (0:0).
Ҳаққулобод шаҳри. “Шодлик” стадиони. 1156 томошабин.

“АНДИЖОН” – “ХОРАЗМ” - 3:1 (2:0).
Андижон шаҳри.  “Соғлом авлод” спорт мажмуаси ўйингоҳи. 4536 томошабин.

 “ДИНАМО” – “МАШЪАЛ” – 0:1 (0:1).
Самарқанд шаҳри. “Динамо” стадиони. 13250 томошабин.