ПРО-Лига, “А” гуруҳи. 10-турда энг кўп мухлис Андижонда

Футбол энг аввало мухлислар учун ўйналади. Аммо ПРО-Лигада ишқибозларнинг ташрифи анча камайиб бормоқда. Боз устига Рамазон ойида мухлисларнинг стадионга келиши нисбатан пасайиб кетди.

Хусусан, 10-турнинг 4та ўйинига жами 7 175та мухлис қадам ранжида қилди. Бу эса ҳар бир ўйинга ўртача 1 793 нафар томошабин демакдир.

Энг кўп мухлис яна Андижондаги “Соғлом авлод” стадионига ташриф буюрди. Турнинг марказий ўйини бўлмиш – “Андижон” – “Динамо” баҳсини бевосита 2861 нафар томошабин кузатиб борган. Гарчи бу рақамлар турнинг энг юқори кўрсаткичи бўлсада, Андижон учун оз дейиш мумкин. Негаки, яхши биламиз илгари “Андижон”нинг уй ўйинларига 10 000дан кам мухлис кирмасди. Жамоа қуйи лигага равона бўлгач, томошабинларнинг ҳам ҳафсаласи совугани аниқ.

10-турда энг кам мухлис Ғузордаги ўйинда кузатилди. “Шўртан” – “Истиқлол” баҳсини атига 513та томошабин стадионнинг ўзида кўриб борди.

Томошабинлар ташрифи кимда қандай?
“АНДИЖОН” – “ДИНАМО” - 3:1 (2:0).
Андижон шаҳри. “Соғлом авлод” стадиони. 2861 томошабин.
“ОРОЛ” – “МАШЪАЛ” - 0:1 (0:1).
Нукус шаҳри. “Турон” стадиони. 2411 томошабин.
“ШЎРТАН” – “ИСТИҚЛОЛ” - 2:0 (2:0).
Ғузор шаҳри. “Ғузор” стадиони. 513 томошабин.
“СУРХОН” – “ХОРАЗМ” - 4:1 (2:0).
Термиз шаҳри. “Алпомиш” стадиони. 1390 томошабин.