Паулу Барбоза: «Чемпионликда Сантушнинг улуши катта»

- Ғалабадан сўнг ҳиссиётлар қандай? Ярим финалдан олдин Португалия терма жамоаси кўнгилдагидек ўйин намойиш қилолмаяпди, дегандингиз.

- Ғалаба қозониш билан яхши ўйнашнинг фарқи бор. Португалия фақатгина қўшимча вақтларда яхши ўйнади. Франция асосий вақтда ташаббусга эга бўлди. Яна қайтараман, биз чемпионат давомида кўнгилдагидек ўйин намойиш қила олмадик. Бу - факт. Лекин шунга қарамай терма жамоа финалга қадар етиб борди. Бошқа тарафдан Исландия, Польша, Уэльс каби жамоаларни кучли рақиб дея олмайман. Финалда эса жиддий рақибга тўқнаш келдик.

Эҳтирослар ҳақида гапирадиган бўлсам, барча ҳамюртларим сингари Португалиянинг чемпион бўлишини истагандим. Мамлакатда ҳозир катта байрам. Жамоа Роналдусиз ҳам ғалаба қозониш мумкинлигини исботлади. Улар «Олтин авлод» (Фигу, Руй Кошта ва бошқалар) қилолмаган ишни уддалашди.

- Сиз Португалияни Роналдусиз ўйнаса яхши бўларкан, дедингиз. Сардорсиз жамоанинг ўйинига қандай баҳо берасиз?

- Менимча, яхши ўйнашди. Жамоа Криштианусиз ўйнаса, ҳужумда вариантлар кўп бўлади. Роналду майдонда бўлса, ўйин у орқали ташкиллаштирилади. Шу тариқа вариантлар кам бўлади. Бу билан сардорни захирага ўтқазиб қўйиш керак, демоқчи эмасман. Шунчаки, жамоа унга боғланиб қолмаслиги лозим. Агар Роналду формада бўлмаса, жамоа ҳеч нима қилолмай тураверади.

- Пайет ва Роналдунинг тўқнашуви борасидаги фикрингиз? Франциялик футболчи айбдорми?

-  Португалияда барча буни бахтсиз тасодиф дейишяпти. Ўша вазиятда Пайет тўпга ўйнаганди. Жароҳат етказиш истаги бўлмаган.

- Роналдуни олиб чиқиб кетишганда, французларни энди ютиб бўлмайди деб ўйладингизми?

- Кўпчилик шундай ўйлаган. Лекин жамоа Роналдусиз ҳам Еврода ғолиб чиқиш мумкинлигини исботлади.

- Криштиану учун бу соврин ҳақиқатан ҳам энг муҳимми?

- Агар у шундай деган бўлса, ҳа. Бунинг устига Роналду терма жамоа билан ҳеч нима ютмаганди. Ваҳоланки, бу ғалаба бироз аламли кечган бўлиши мумкин. Чунки жамоа совринни унингсиз қўлга киритди.

- Энди у ҳам Месси сингари терма жамоадаги фаолиятини якунлаш ҳақида ўйлаб қолмайдими?

- Менимча, Роналду бундай қилмайди. Криштиану ва Месси — бошқа-бошқа инсонлар. Агар Криштиану 40 ёшигача ўйнаса, терма жамоада ҳам шунча ўйнайди.

- Финалда Португалия терма жамоаси сафида энг яхши ўйнаган ким бўлди?

- Руй Патрисиу! У нафақат финалда, балки Европа чемпионатининг барча учрашувларида яхши бўлди. Финалда жамоани бир неча бор қутқарди. Чунки Франция терма жамоасида гол уриш имкониятлари кўп бўлганди. Яна финалнинг энг яхши ўйинчиси деб топилган Пепе ҳақида ҳам шундай фикрдаман. Лекин, менимча, бу ўйиндаги натижа Патрисиуга боғлиқ бўлди.

- Эдерни асосий қаҳрамон дейиш­япти. Португалияда кўпчилик уни терма жамоага лойиқ деб ҳисобламаганди...

- Ҳа. Ҳақиқатан ҳам, бу ҳақда кўп гапиришди. Лекин у ягона ҳужумчи эди. Финалда эса Эдер ҳужумчи эканини ва терма жамоага кераклилигини исботлади. Агар Роналду чиқиб кетмаганда, Эдер бунчалик ўйнай олмасди.

- Фернанду Сантуш барча футболчиларни майдонга туширган Европа чемпионатидаги ягона мураббий бўлди.

- Сантушга алоҳида миннатдорчилик билдириш керак. Тарихда биринчи бор Португалияда кучли жамоа шакллантирди. Ҳар бир футболчи майдонда бор кучини ишга солди. Жамоада юлдуз кўп бўлса, бундай ҳолат камдан-кам кузатилади. Энг муҳими, Сантуш ҳар қандай футболчи ҳар қандай вазиятда майдонга тушиши мумкинлигини кўрсатиб қўйди. Шунингдек, у ҳар сафар жамоанинг турнирда ғолиб чиқишига ишонишини таъкидлади. Жамоа Францияга йўл олаётганида мураббий Лиссабонга 11 июль куни, яъни финалдан сўнг қайтишини айтиб ўтганди. Қисқаси, чемпионликда мураббийнинг улуши катта бўлди.

- Терма жамоада қайси футболчилар сизни ҳайрон қолдирди?

- Рафаэл Геррейра, Руй Патрисиу ва Ренату Саншешларни алоҳида таъкидлаган бўлардим. Улар жуда юқори савиядаги ўйин намойиш қилишди.

- Агар «Бенфика» Евро-2016 тугашини кутганида Саншешни 35 миллион евродан қимматроққа сотиши мумкинмиди?

- Унинг трансферидан лиссабонликлар турли бонуслар орқали 80 миллион ишлаб олишлари мумкин. Шундоқ ҳам «Бенфика» Саншешни яхшигина пуллаган.

- Қайси футболчи ажаблантирди?

- Гарчи бу ғалати туюлса-да, Роналду. У бор имкониятларини юз фоиз ишга солмади.
 

Ж.БОБОХОНОВ тайёрлади