Ўзбекистон U-22 терма жамоаси Хитойдаги йиғинини якунлади

Хитойнинг Шанхай шаҳрида навбатдаги йиғинини ўтказган Ўзбекистон U-22 ёшлар терма жамоаси режага мувофиқ Хитой U-22 ёшлар терма жамоасига қарши иккита ўртоқлик учрашувида майдонга тушди. Дастлаб, 21 июнь кунии ўтказилган учрашувда Мақсудов шогирдлари 2:0 ҳисобида ғалаба қозонган бўлсалар, 24 июнь куни бўлиб ўтган иккинчи учрашувда ҳисоб очилмаган - 0:0.

Эслатиб ўтамиз, терма жамоа бош мураббийи Шуҳрат Мақсудов Хитойдаги йиғин давомида жами 23 нафар футболчини синовдан ўтказган. Терма жамоа аъзолари 25 июнь куни Хитойдаги йиғинини якунлаб, 26 июнь куни тонгда Сеул орқали Тошкентга қайтиб келишади.

Маълумот ўрнида, Ўзбекистон U-22 ёшлар терма жамоаси келаси йилнинг март ойида ўтказилиши режалаштирилган U-22 ёшлар ўртасидаги Осиё Чемпионати саралаш баҳсларида иштирок этади. Айни дамда, саралаш ўйинлари санаси ва мезбони ОФК томонидан тасдиқланмаган.