Ўзбекистон – Гонконг учрашувида майдонга югуриб тушган мухлислар маъмурий жавобгарликка тортилди, 2 нафар шахс 5 суткага қамалди

"Юз берган ҳолатда стадион ходимлари ва Ўзбекистон футбол ассоциацияси масъулларининг ҳар қанча огоҳлантиришларига қарамай, бу шахслар ўз билганларидан қолмадилар.

Футбол майдонида тартибсизликни юзага келтирган шахслар ҳуқуқни муҳофаза қилувчи орган ходимларининг қонуний талабларини бажармай, уларга ҳам қаршилик кўрсатдилар. Шундан сўнг улар дарҳол Чилонзор тумани ички ишлар органлари фаолиятини мувофиқлаштириш бошқармасига олиб келинди. Тартиббузарларнинг 6 нафари вояга етмаган шахс бўлганлиги сабаб Маъмурий жавобгарлик тўғрисидаги кодекснинг 47-моддасига биноан уларнинг ота-онасига нисбатан маъмурий баённома расмийлаштирилиб, жаримага тортилди. 

Қолган 3 нафар шахс юзасидан ҳам маъмурий баённома тузилди ва қонуний қарор қабул қилиш учун Жиноят ишлари бўйича туман судига юборилди. Суд томонидан қоидабузарларнинг 2 нафари Н.А. ва К.Р. Маъмурий жавобгарлик тўғрисидаги кодекснинг 183 ва 194-моддаларига биноан 5 суткадан, М.М.га эса 7 сутка маъмурий қамоқ жазоси тайинланди", – дейилади Тошкент шаҳар ИИБ хабарида. 

Маълумот ўрнида, 26 март куни "Бунёдкор" стадионида ЖЧ-2026 2-саралаш босқичи доирасидаги Ўзбекистон – Гонконг (3:0) беллашуви ўтказилди. Ушбу учрашувдан сўнг ўнлаб мухлислар майдонга югуриб чиқишди. Эндиликда ЎФА ОФК томонидан ўрнатилган йирик миқдордаги жарималарни тўлаши керак бўлади.