Ўзбекистон футбол ассоциацияси Ўзбекистон Давлат Жисмоний тарбия ва спорт университети билан ҳамкорликни йўлга қўйди

Мазкур ҳамкорликдан асосий мақсад Университет талабалари орасида футбол ҳакамлиги ва мураббийлиги билан шуғулланиш истагида бўлган ёшларни ҳар томонлама қўллаб-қувватлаш, халқаро мусобақаларда фаолият олиб борадиган иқтидорли ҳакамлар ва истеъдодли мураббийларни тайёрлашдан иборат.
 
ЎФА Мураббийлар тайёрлаш департаменти ва Ҳакамлар ва назоратчилар департаменти томонидан Ўзбекистон Давлат Жисмоний тарбия ва спорт университети юқори курс талабалари билан турли учрашувлар ташкил этиб, улар орасида ҳакамлик ва мураббийликка иқтидори бор ёшлар танлаб борилади. Улар билан биргаликда турли назарий ва амалий машғулотлар олиб борилиб, касбга бўлган лаёқати сайқаллаб борилади. Шунингдек, турли мусобақалар ташкил этиб, Университет талабаларининг иқтидори мазкур мусобақаларда синаб кўрилади. Уларга тўғри йўналиш бериб, хато ва камчиликлар таҳлил қилиб борилади.
 
Жорий йилнинг 2 март куни Ўзбекистон Давлат Жисмоний тарбия ва спорт университетида талабалар билан дастлабки учрашув ўтказиш режалаштирилган. Ушбу учрашувда таниқли ҳакам, ФИФА рефериси Равшан Эрматов ўз гуруҳи билан иштирок этади.