Осиё кубоги-2027 саралаши. Туркманистон сафарда, Тожикистон ўз уйида ғалабага эришди

Бу босқичда ЖЧ-2026 саралашининг ҳозирги босқичига чиқа олмаган жами 24 терма жамоа 6 та гуруҳда 6 та йўлланма учун кураш олиб боради. Яъни фақат гуруҳ ғолибларигина Осиё кубогига чиқади.

Туркманистон саралашни сафарда Хитой Тайпеига қарши баҳс билан бошлади. Элман Тагаев ҳисобни очди, бунга мезбонлар Куаменинг голи билан жавоб беришди. Учрашув тугашига 7 дақиқа қолганида Язқилич Гурбановнинг голи Туркманистонга сафардаги муҳим ғалабани келтирди - 2:1. Ушбу гуруҳдан ўрин олган Таиланд - Шри Ланка учрашуви Тошкент вақти билан соат 17:30да бошланди.

Тожикистон эса ўз майдонида Тимор Лестени қабул қилди ва 3-дақиқада Ваҳдат Ханонов томонидан урилган гол эвазига 3 очкога эга чиқди - 1:0. Тожикистон сафида ўзбек клубларида ўйнаётган Зоир Жўрабоев, Эҳсони Паншанбе, Манучеҳр Сафаров ва Шаҳром Самиев каби футболчилар асосий таркибда майдонга тушишди. Гуруҳнинг иккинчи ўйинида Филиппин ўз майдонида Мальдив оролларини 4:1 ҳисобида таслим қилди.