Олимпиада-2020 Токиода бўлиб ўтади

Бу ҳақда Буэнос-Айресдаги қўмита йиғилиши давомида МОҚ раиси Жак Рогге маълум қилди.

2020 йилги олимпия ўйинларини қабул қилиш учун Истанбул (Туркия), Токио (Япония) ва Мадрид (Испания) даъвогарлик қилишди.

Овоз бериш жараёни қуйидагича бўлди: биринчи босқич – Токио (42та овоз), Мадрид ва Истанбул – 26тадан (қўшимча овоз бериш – 45-49), иккинчи босқич – Токио (60та) ва Истанбул (36та).

Токио 1964 йилги Олимпиада ўйинларини қабул қилганди. 1998 йилги қишки Олимпиада ўйинларига Япониянинг Нагано шаҳри мезбонлик қилганди.

Бугун МОҚ Олимпиада-2020га киритилиши мумкин бўлган спорт турлари бўйича қарор қабул қилади. Битта ўринга сквош, бейсбол/софтбол ва кураш даъвогарлик қилмоқда. Бундан ташқари МОҚ учун янги президент сайлови бўлиб ўтади. Жак Рогге ташкилот бошқарувидаги 12 йиллик фаолиятидан сўнг истеъфога чиқади.