"Навбаҳор" Туркиядаги дастлабки ўртоқлик учрашувида дуранг қайд этди

Хабарингиз бор, "Навбаҳор" клуби янги мавсумга тайёргарликни Туркиянинг Анталия шаҳрида ўтказмоқда. Клуб матбуот хизматининг хабар беришича, "лочинлар" ўзларининг илк ўртоқлик учрашувларини ўтказишган. 

"Янги мавсумга тайёргарликни Туркиянинг Анталия шаҳрида олиб бораётган “Навбаҳор” бугун мазкур ўқув-машғулот йиғини доирасидаги дастлабки назорат-синов баҳсини ўтказди. Илк ўртоқлик ўйинида жамоамизга Венгриянинг “Спартакус Ньиредьхаза” (Ньиредьхаза) клуби рақиб бўлди. 

Таъкидлаш жоизки, мазкур назорат учрашувининг ҳар икки бўлимида “лочинлар” икки хил таркиб билан ҳаракат қилишди. 

Айтиш лозимки, мазкур беллашувнинг 1-бўлимида устунлик вакилларимиз тарафида бўлди. Аммо футболчилар имкониятлардан фойдалана олишмади. 

Иккинчи бўлимда “Навбаҳор” майдонда бир киши кам бўлиб, ҳаракат қилганлиги боис, иккинчи 45 дақиқаликдаги ўйин тенг курашлар остида ўтди. Шундай бўлсада, ҳеч қайси футболчига дарвозани ишғол этиш насиб этмади ва учрашувда нурсиз дуранг қайд этилди – 0:0", - дея хабар беради "Навбаҳор" клуби матбуот хизмати.