"Навбаҳор": Тайёргарлик бошланди

Равшан Бозоров бошчилигидаги дастлабки машғулотда жамоа таркибида мавсум биринчи ярмини “Норин”да ўтказган Артур Парванов, Мурод Тўйчибоев ва Владислав Алексинлар ҳам шуғулланишди. Дастлабки кунги машғулотларда турли сабабларга кўра биринчи даврани “Навбаҳор”да ўтказган футболчилар иштирок этишмади. Уларни жамоа сафига пойтахт йиғини чоғида қўшилишлари кутилмоқда.

“Навбаҳор” эртага ҳам Наманганда машғулот ўтказади. Янги ҳафта бошида жамоамиз аъзолари Тошкент вилоятининг тоғли худудига йўл олишади. Бир ҳафталик йиғин давомида асосий эътибор футболчиларнинг жисмоний ҳолатини яхшилашга қаратилади.  Бир ҳафталик йиғин якунига етгач, жамоа аъзоларига қисқа муддатлик дам олиш эълон қилинади. 20 июлдан жамоа аъзолари тайёргарликнинг асосий қисмини ўташ мақсадида Тошкентда тўпланишади. Пойтахт йиғини давомида назорат учрашувларини ўтказиш ҳам режалаштирилган.

Давралар оралиғида таркибда бир қатор ўзгаришларни рўй беришини айтиб ўтиш мумкин. Бу борада бош мураббий Равшан Бозоров қуйидагиларни маълум қилди: - Бугун жамоа сафига “Норин”дан таклиф этилган Артур Парванов, Мурод Тўйчибоев ва Владислав Алексинлар қўшилишди. Айни пайтда таркибни кучайтириш мақсадида бир қатор футболчилар билан музокаралар олиб бормоқдамиз. Ўзаро келишувга эришилган футболчиларни жамоамиз сафига Тошкент вилоятидаги йиғинда қўшилиши кўзда тутилган. Келишув борасида бир тўхтамга келганимиздан кейин жамоа таркибига қўшиладиган ўйинчилар ҳақида маълумот берсак тўғрироқ бўларди.