"Навбаҳор": Александар Лепосавич сафга қўшилади

Чизиқларни кучайтириш ва таркибдаги рақобатни кучайтириш мақсадида бир қатор футболчилар билан музокаралар давом этаётганлиги ҳам маълум қилинганди. Жамоага маҳоратли ҳужумчини жалб этиш ниятида сербиялик футболчи Александар Лепосавич билан музокараларга киришилганди. 1987 йилнинг 3 ноябрида Сербиянинг Иваница шаҳрида туғилган Лепосавич “Навбаҳор”нинг 19 январда Тошкентда бошланадиган йиғинида иштирок этади. Ҳужумчи фаолиятини Иваницанинг “Явор” клубида бошлаганлигини айтиб ўтиш жоиз. 2014 йилги мавсум биринчи ярмида Сербиянинг “Единство” клубида тўп тепган ҳужумчи мавсум иккинчи қисмини Черногориянинг “Петровач” клубида ўтказди. Бундан ташқари Лепосавич “Сумадия”, “Слога Петровач” ва “Слога Позега” жамоалари сафида тўп тепган. Александар Сербия ва Черногория чемпионатларида 124 та ўйинда майдонга тушиб, рақиблар дарвозасига 21 та гол урган. Агарда хорижлик ҳужумчи Тошкентда ўтадиган йиғин давомида ўзидан яхши таассурот қолдирса навбатдаги мавсумни “Навбаҳор”да ўтказиш имкониятига эга бўлади. Лепосавич иштирок этган ўйинлар ва урган голларини кўришни истасангиз қуйидаги манзилга http://m.youtube.com/watch?v=UMeZyIyzpBI ўтиб ҳужумчининг ҳаракатларига гувоҳ бўлишингиз мумкин.