"Насаф" Зафар Полвоновга жиддий қизиқмоқда

"Насаф" жамоаси бош мураббийи Рўзиқул Бердиев ўз жамоасида "Шўртан" ҳужумчиси Зафар Полвоновни кўришни истамоқда.

Олинган хабарларга кўра, Зафар Полвонов мавсум ўртасида "Шўртан"ни ёлғизлатиб қўйиш ниятида эмас. "Шўртан" ҳужум чизиғи вакилларидан бири саналган Кенжа Тўраевни "Олмалиқ"қа йўл олганидан сўнг Зафар Полвонов "Шўртан"ни қийин ҳолатда ташлаб кетишни лозим топмаяпти. Шу боис ушбу трансфер мавсум ўртасида амалга ошмаслиги мумкин.

Йил бошида ҳам қаршиликлар "аждарлар" дарвозасини назорат ўйинида нишонга олган Зафар Полвоновга таклиф билан чиқишганди. Бироқ футболчи янги мавсумга 10 кун қолганида "Шўртан"ни "Насаф"га алмашишни истамаган.

Эслатиб ўтамиз, "Насаф" ҳужумчилари Азамат Алланиязов, Илҳом Шомуродов ҳамда Бобир Абдихолиқовнинг ушбу мавсумда олий лигада урган жами голлари 8тани ташкил этади.

Зафар Полвонов эса биринчи давра ўйинларида "аждарлар"нинг барча ҳужумчилари урган голлари билан тенг равишда 8 маротаба рақиблари дарвозасини аниқ "ўққа" тутган.