Мино Райола: “Наполида фақат фильмлар суратга олишни билишади”

- Ибрадан келажакда нима кутиш мумкин?
- Унинг жисмоний ҳолати ва ўйинга муносабати билан яна камида 5 йил ўйнаши керак.

- Тўлиқ беш йилми?
- Вақт ўтиши билан унинг кучи кўпайиб бормоқда. Бўш пайтида Златан овга чиқади. У нималар қилишини ҳисобга олсак, бунчалик ишга инсон улгурмайди деб ўйлаш ҳам мумкин.

- У кейинги мавсум қаерда ўйнашини биласизми? Хитойдан 70 миллионлик таклиф келиб тушгани ростми?
- Бунинг устидан ҳали яна яхшилаб ўйлаб кўриш лозим. Хитой борасида аниқ рақамларни айтмайман, аммо у ҳайратланишга арзийди. Златанга жаҳоннинг турли бурчакларидан таклифлар бор, лекин бирор нарсани ҳал қилишга ҳали эрта. Мен уч ҳафталик таътилга чиқаман ва қайтганимда кўп нарсалар жойида бўлиши даркор, фақат Златаннинггина иши эмас.

- ПСЖ билан музокаралар қандай кечди?
- Улар Ибрани олиб қолиш учун қўлдан келган ишни қилишмоқда. Париж унинг учун ёмон бўлмаган вариант сифатида қолмоқда.

- Премьер-лига тўғрисида нима дейсиз?
- “Манчестер Сити”дан бошқа барча жамоа унга қизиқиши борлигини билдирди.

- Италияликлар-чи?
- Ҳамма таклиф қилди, ҳатто “Наполи” ҳам. Гарчи, у ерда фақат фильм суратга олишни билишса ҳам.

- Яна ким?
- Президент Эрик Тоҳирнинг режалари ноаниқ бўлишига қарамай, “Интер” ҳам. “Милан”га эса бошқа жамоалар билан рақобат қилиши учун яна 3-4 нафар футболчи билан шартнома имзолаши зарур бўлади.

- Марио Балотеллини нима кутмоқда?
- Биринчи марта унинг ўзини тутиши ҳақида ёмон фикр билдира олмайман. Ҳозирча Мариода жароҳатдан кейин ўзини кўрсатишга имкон бўлгани йўқ. Айни пайтда унинг майдонда яна кулиб ҳаракат қилиши муҳим. У муаммоларини ҳал қилиши шарт.

- Жанлуижи Доннарумма келажаги ҳақида нима дейсиз?
- Умид қиламанки, Антонио Конте уни Европа чемпионатига олиб кетади. Унинг Францияда ўйнашига умид қилмайман, аммо навбатдаги жаҳон чемпионатидан аввал унинг бундай муҳитни ҳис қилиши катта аҳамиятга эга.

- Унинг трансфери билан боғлиқ кўплаб хабарлар тарқалмоқда. У “Милан” ёки бошқа жамоа билан шартнома имзолашни мўлжаллаяптими?
- “Милан”нинг ишлари жойида. Унга берилаётган эътиборни Жанлуижи қадрлайди. Кристиан Аббьяти унга худди катта акасидек муносабатда. Ҳеч кимга сир эмаски, Доннарумма кўпчиликда катта қизиқиш уйғотяпти. Шартнома бўйича ҳеч қандай муаммо йўқ. Адриано Галлиани билан учрашиб, ҳаммасини ҳал қиламан. Агар Жанлуижи кетишга қарор қилса, бу Европанинг бошқа биринчилиги бўлади. Италияда унинг учун фақат “Милан” мавжуд.

- Поль Погбанинг режалари қандай?
- Охирги йилларда у мени ёқимли ажаблантирмоқда. У ҳақиқий юлдузга айланди. Унинг асосий ютуғи – хотиржамлик. Бу унга мавсум бошидан буён танқидларга дош беришга ёрдам берди. У Франция терма жамоасида асосий ролни ўйнайди. “Ювентус”да ҳам бежизга 10-рақамли либосда майдонга тушмаяпти.

- “Ювентус”нинг трансфер режаси Погбага боғлиқ бўлади.
- Ўтган йил билан таққосласак, ҳеч нарса ўзгармади. Унинг клуб билан муносабати жойида, “Юве” уни 100 миллион евродан камига сотмайди ва бунга умуман қарши эмасман. Лекин Поль Туринда жуда бахтли. Биз янги шартнома имзолашга ҳам тайёрмиз.

- Ромелу Лукаку ҳақида кўп гапиришяпти.
- “Ювентус”га ўтиш унинг учун ажойиб бўларди, аммо Лукакуга ПСЖ ва “Реал” ҳам қизиқиш билдирмоқда. Парижда кўп нарса ўзгарди. Улар нефть нархининг тушиши туфайли бир футболчига 90 миллион евро сарфлашга тайёр эмас. Шу сабабли Игуанни сотиб олишдан кўра, Ибрагимовични ушлаб қолишга интилишяпти.

- Туринга Эдинсон Кавани ва Генрих Мхитарян ҳам кўчиб ўтиши мумкинми?
- ПСЖ Каванини олиб қолиши мумкин. Улар Кингсли Коман тўғрисида унутишмади ва шунинг учун Эдинсоннинг Туринга ўтиши сўроқ остида.
Мхитаряннинг Массимилиано Аллегрига ёқишини биламан. Ўз навбатида Генрихга ҳам “Юве” ёқади, клуб буни Томас Тухель билан ҳал қилиши лозим. Мхитарян билан шартнома 2017 йилда тугайди, аммо “Боруссия” мураббийи уни сотиш ниятида эмас. Илькай Гюндоган билан ҳам ҳолат шундай, ҳозирча ҳеч нарса аниқ эмас. Генрихнинг Туринда муваффақиятга эришишига шубҳа қилмайман. Унинг ишлари фаолиятини тугатгач ҳам жойида бўлишига умид қиламан.

- “Юве” яна Эктор Моренога ҳам қизиқиш билдирмоқда?
- Бу ажойиб трансферга айланарди. Эктор охирги ойларда анча ўсишга эришди. ПСВ камбағал жамоа эмас ва унинг трансфери камида 15 миллион еврога тушиши мумкин.

- Костас Маноласнинг режалари қандай?
- Уни барча топ-клублар билан боғлашмоқда. Унинг премьер-лигага ўтишини билмайман, аммо Костас услуби билан бошқа чемпионатларда ўзини кўрсата олади. “Рома” эса уни сақлаб қолишга бор имкони билан интилади.
 

Беҳзод Назаров