Милан Митрович: "Насаф" билан ўйинда бизнинг голни ҳисобга олишмаганди. ВАР гоҳида ёрдам бермоқда, гоҳида эса акси"

Ушбу баҳсда мезбонлар посбони Милан Митрович жуда яхши ўйнади. У беллашув давомида жамоасини бир неча бор муқаррар голлардан сақлаб қолди. Шу боис Championat.asia сайти талқинига кўра, 14-турнинг энг яхши дарвозабони Милан Митрович бўлди. Биз бу борада сербиялик кипернинг фикрлари билан қизиқдик.

"Навбаҳор" билан осон бўлмаган ўйинни ўтказдик. Боз устига биз ўз майдонимизда тўп тепганимиз йўқ. Рақиб эса иккинчи даврада ўз сафига бир қатор тажрибали легионерларни қўшиб олгани боис етарлича қаршилик кўрсатиши кутилганди. Жамоамизда қайсидир маънода руҳий томондан босим бор эди, дея оламан. Олдинги тўртта турда турнир жадвалидаги рақобатчиларимиз билан ўйнагандик. Фикримча, "Навбаҳор" дарвозасига ўз вақтида йўл топа олганимиз фойдамизга ишлади. Голдан сўнг режа ўзгарди ва кўпроқ ҳимояга эътибор қаратилди. Яхши ҳимояландик ва якунда ғалаба бизга насиб қилди. Мақсадимиз сари интилишда давом этамиз.

ВАР тизимига изоҳ бермаган бўлардим. "Насаф" билан ўйинни яхши эсласангиз, биз гол урдик. Лекин ҳакамнинг якуний қароридан сўнг голимиз бекор бўлди. Натижада мавсумдаги илк мағлубиятни қабул қилиб олдик. ВАР тизими жорий қилингандан бери  футболда кўп нарса ўзгариб кетди. Бу борада фикр билдириш бизнинг ваколатимизга кирмайди. Ҳар кимнинг ўз қараши бор. ВАР гоҳида ёрдам бемоқда, гоҳида эса аксинча. Футбол шуниси билан қизиқарли спорт тури ҳисобланади",- дейди Митрович.

Суперлига. 14-тур лауреатлари