"Металлург": Биринчи кўрик учрашувида имконият бой берилди

Ўйин пахтакорчиларнинг Қибрайдаги ўқув-машғулот масканида бўлиб ўтди.

Учрашувнинг биринчи тайми амалдаги чемпионнинг устунлиги остида ўтди. Даставвал қанот ярим ҳимоячиси Алибобо Раҳматуллаевнинг пасидан кейин Машарипов ҳисобни очишга муваффақ бўлганди. Иккинчи голни эса бекободликлар ўзлари “ташкил этиб” беришди. Ҳимоячи тўпни боши билан дарвозабонга қайтарганди. Суҳроб Султонов тўпга чиқишда кечикди ва бундан унумли фойдаланган Баҳодир Пардаев фарқни оширди.

Бекободликлар иккинчи таймга келгандагини ўз ўйинларини топиб олишди ва жавоб тўпини киритиш учун вазиятлар содир эта бошлашди. Аввалига Алишер Зиёвуддиновда яхши имконият бўлганди. Аммо “Металлург” ярим ҳимоячиси ундан фойдалана олмади. Бироз ўтгач Алишер жамоасининг яна бир ҳужумини бошлаб берди. Ёш ҳужумчилардан Суннат Эрматов жарима майдонига ёриб кираётган Миртўра Акбаровга узатди. Пахтакорчилар посбони Акбаровни қўполлик билан тўхтатиб қолганлиги учун пенальти белгиланди ва пенальтини Алишер Зиёвуддинов бехато амалга ошириб, ҳисобдаги фарқни қисқартиришди.

“Металлург” бу учрашувни қуйидаги таркибда ўтказди:

1-тайм: Суҳробжон Султонов, Ҳикмат Ҳошимов, Жасур Аҳмедов, Дониёр Одилов,Даврон Каримқулов, Дилмурод Каримов, Аюбхон Нўъмонов, Шоҳназар Норбеков, Руслан Вагапов, Саид Абдужабборов, Зоҳид Абдуллаев.

2-тайм: Суҳроб Султонов, Саидкомил Акбаров, Жавлон Мирабдуллаев, Нозим Эсонов, Александр Ковалев, Мирғиёс Сулаймонов, Алишер Зиёвуддинов, Сардор Расулов, Арслон Султонов, Суннат Эрматов, Миртўра Акбаров. 

“Металлург” кейинги назорат учрашувларини “Бунёдкор” ва “Олмалиқ” жамоаларига қарши ўтказади.