Мбаппе вакиллари ПСЖга таҳдид қилди

"Реал" ҳужумчиси Килиан Мбаппе ПСЖни 100 млн евро тўламагани учун судга бериши мумкин. Бу миқдорга иш ҳақи ва бонуслар киради. Бу ҳақда футболчининг онаси Файза Ламари хабар берди.

"Бу ҳали ҳам давом этмоқда. Ҳозир ҳаммаси Килиан вакилларининг қўлида, аммо мен ПСЖга ишонаман ва ҳаммаси тезда нормал ҳолатга қайтади. Ҳозиргина жавоб хати олдик, энди қарор қабул қилинади. Иш судгача борадими? Агар бошқа танлов бўлмаса, ҳа, албатта. Умид қиламанки, биз 2 йил олдин имзолаган шартнома шартларига риоя қилинади.

Нима бўлганини ҳеч ким аниқ тушунтириб бера олмайди, на мен, на ПСЖ вакиллари, чунки сўнгги 2 йил давомида Килиан ва президент Ал Хелайфи ҳар доим якка тартибда учрашишган. Буларнинг барчаси февраль ойида кетишини эълон қилган Килианнинг ўйинига тўсқинлик қилмади", – деди Ламари.