Лушан "Сўғдиёна"га келаётган юлдузларга асосий таркибдан жой кафолатланмаслигини эълон қилди

- "Сўғдиёна" таркибни кескин кучайтираётгани ҳақиқат. Биз нафақат Ўзбекистондаги футболчилар, балки хориждан кучли легионерлар олиб келиш бўйича музокара ўтказяпмиз. Биз имкониятимиз борича кучаямиз. Бизга кучли ва юқори савиядаги футболчилар зарур. Жамоа рақобатга чанқоқ. Чунки раҳбарият қўяётган вазифаларни бажариш учун таркибни кучайтирмоқ лозим. Раҳбарият эса "Сўғдиёна"ни кучли-олтиталикка кириши лозим деб ҳисобламоқда. Шу боисдан ҳам таркибни кескин кучайтирмоқчимиз.

Славко Лукич билан гаплашдим, ҳа уни мен "Сўғдиёна"да кўришни хоҳлайман. Жасур Ҳасанов? Нафақат у, балки бошқа бир қатор футболчилар билан музокара ўтказяпмиз. Мен истаётган футболчиларни "Сўғдиёна"да кўрсам хурсанд бўламан. Лекин бу уларга қўшимча имтиёзлар бермайди. Ким келишидан қатъи назар, улар кучлилигини исботласагина асосий таркибда ўйнашади. Аксинча бўлса, бошланғич таркибда бошқалар ўйнайди. Ҳар қандай ҳолатда ҳам биз кучайишни истаймиз. Умид қиламанки, бу трансферлар бизга кучли-олтиликка киришга ёрдам беради.

Иккинчи давра якунланишига оз фурсат қолди? Мен бу қисқа фурсатда таркибни кучайтирган ҳолда кучли-олтиликка жамоани олиб кира оламанми? Билмадим, фолбин эмасман. Биз шунчаки ўз ишимизни қиламиз, қолганини вақт кўрсатади. Агарда қолган барча ўйинларни ютадиган бўлсак, унда нафақат олтиталик, балки 1-ўринда бўламиз. Айтадику, жўжани кузда санаймиз.

Ишонинг, ҳозирги чемпионатдаги тизим ҳали бизга жуда кўп сюрпризларни тақдим этади. Ҳали чемпионлик масаласи ҳам очиқ турибди. Регламентдаги "олтин очколар" қоидаси ҳали кўп жойни ағдар-тунтар қилади. Жуда катта сюрпризлар бўлишини тахмин қиляпман. Бу "олтин очколар" қоидаси қанчалик тўғри ёки йўқ билмадим, аммо бу регламент бизга янги совғаларни тақдим этади. Нима ҳар қилардик, регламентга бўйсунган ҳолатда иштирок этаверамиз. Бизга нима фарқи бор?