Лопетеги "Вулверхэмптон" ҳужумини Кунья билан кучайтирмоқчи

Мутахассис ҳужум чизиғидан умуман қониқмаган ва шу туфайли "Атлетико" Мадрид форварди Матеус Кунья Премьер-лига вакили таркибига жалб қилинади. 23 ёшли бразилиялик ҳужумчи қишки трансферлар пайтида клубини алмаштиришга яқин. Бу Лопетегининг жамоа бошқарувига келганидан сўнг амалга оширадиган илк трансфери бўлади. 

"Бўрилар" жорий мавсумда Англия чемпионатида атиги 8 та гол уришди. Шу туфайли жамоа жадвалнинг энг қуйи поғонасида бормоқда. 

2020 йилда Бразилия термаси билан Олимпиада олтин медалини қўлга киритган Кунья ушбу мавсумда "матрасчилар" таркибида 17 та ўйинда иштирок этди ва ҳали дарвоза турига тўп йўллаганича йўқ. "Атлетико" Чемпионлар Лигасидаги муваффақиятсизликдан сўнг харажатларни қоплаш учун баъзи ўйинчиларидан воз кечишга мажбур бўлмоқда. 

Матеус Куньяга инглиз жамоалари орасида "Лидс", "Эвертон" ва "Астон Вилла"дан ҳам таклифлар бор.