Лондон клуби ўқсиз автоматга ўхшатилмоқда

Учрашувдан сўнг “Манчестер Юнайтед”нинг собиқ ҳимоячиси Рио Фердинанд “шпорлар” бош мураббийи Жозе Моуринёни кескин танқид қилди.
“Ҳозир лондонликларнинг кайфиятига ҳавас қилиб бўлмайди. Аллининг билдирган ҳиссиётларини тушуниб турибман. Қизиғи, у аламли мағлубият ҳақида гапирмади, балки жамоавий ўйин даражасининг пастлигига асосий урғу берди. Мухлислар ҳам ўзлари кутган мураббийни майдонда кўрмаётганликларидан норози.
Лукас Моура ва Дели Алли ҳужумчиларсиз чизиқда асосий вазифани бажаришларига тўғри келди. Шу куни “Тоттенхем”нинг ўйини ўқсиз автоматга ўхшаб кетди. Сон Хён Мин энг керакли вазиятда жамоасига ёрдам бера олмади. Улар нима қилаётганларига ўзлари ҳам тушунишмади. Тўғриси, бу жамоада Жозенинг келажагини кўролмаяпман. Ҳар бир клубнинг ўз олдига қўйган улкан режалари бўлади. Бу эса кўп факторлар билан футболчиларга, айниқса ҳужумчиларга боғлиқ. Тан олиш керак, Кейн ва Соннинг йўқлиги жиддий камчиликларни келтириб чиқариши кутилаётганди. Лекин бу ҳаммаси тугади дегани эмас-ку. Бўш позицияларни етарлича тўлдиришнинг ҳар доим иложи бўлган ва бу борада энди мураббийлар штаби катта саҳнага чиқиши керак эди.
Тўғри, футболчилар ижтимоий тармоқларни кузатишади, матбуот анжуманларида қатнашишади, аммо улар билан майдонда ишлаш бошқача эффект беради. Майдонда мураббий керак бўлса, футболчилардан ҳам кўпроқ ишлаши керак. Моуриньюда эса мен бу ҳислатларни кўрмаяпман. У “шпорлар”нинг ўйин услубига умуман мос келмайди деб ўйлайман. Аксинча, унинг кечаги рақиби Негельсман тўғрисида анча илиқ фикрларни айтиш мумкин. 32 ёш бўлишига қарамай, у “Леипсиг” тарихидаги энг яхши натижага эриша олди”, - дейди Фердинанд.
Маълумот учун, лондонликлар барча турнирларда кетма-кет 6 ўйиндан буён ғалаба нималигини билмай келишмоқда.