“Лестер Сити” вертолёт ҳалокати юзасидан баёнот берди

Кеча “Лестер” клуби президенти Вичай Шриваддханапрабха Англия Премьер-лигаси 10-тури доирасидаги “Вест Хэм”га қарши учрашувдан сўнг ўз вертолётида уйга қайтаётганда ҳалокатга учраганди. Вертолёт ҳавога кўтарилганидан бир неча сония ўтиб, “Кинг Пауэр” стадиони ёнидаги автомобиллар турар жойига қулаб тушган ва ёниб кетганди. 

“Биз Лестершир полицияси ҳамда фавқулодда вазиятлар ходимларига ёрдам беряпмиз. Тез орада клуб томонидан бўлиб ўтган нохуш воқейликнинг барча тавсилотлари расмий равишда эълон қилинади. Ҳозирча айтиб ўтилганидан ташқари қўшимча маълумот тақдим эта олмаймиз”, - дейилади “Лестер” клуби расмий сайтидаги хабарда.

Британия матбуотида тарқатилган хабарларга кўра, “Лестер” президенти вертолёт бортида бўлган ва у воқеа жойининг ўзида вафот этган. Шриваддханапрабха 2010 йилда “Лестер”ни харид қилган эди. Жамоа мавсум-2015/16да ўз тарихида илк бор Англия чемпиони бўлганди.