Кристиан Гросс: "Насаф" жамоавий ўйин кўрсатишда кучли"

Кристиан Гросс: Биз ОЧЛни "Насаф" билан уйда бошлагандик ва эртага ҳам ушбу жамоа билан куч синашамиз. Бизни жуда қийин беллашув кутиб турганини биламиз. Дастлабки баҳсда ҳам осон бўлмаганди. Эртага ўз мақсадимизга эришишга ҳаракат қиламиз.


- Ўтган йилги "Насаф" билан ҳозирги жамоанинг фарқи нима деб ҳисоблайсиз?
- "Насаф"ни ўтган йили ҳам, бу мавсумда ҳам Рўзиқул Бердиев бошқариб бормоқда. Шу боис жамоанинг ўйин услубида катта ўзгариш йўқ. Баҳром Абдурахимов сафардаги учрашувда майдонга туша олмаганди. Эртага бу футболчи майдонга туша олади ва ўйлашимча, бу жамоани янада кучайтиради. Рўзиқул Бердиевни эса кучли мутахассис деб биламан.

- Омар Сома ва Фетцафидис каби футболчилар Қаршига келишмаган. Ўтган йили ҳам жамоа тўпурари Сомани олиб келмагандиз. "Ал Аҳли" "Насаф"ни менсимаяптими?
- Таркибимизда кучли футболчилар жамланишган ва Қаршига кела олмаган етакчиларимизнинг ўрнини улар билан бемалол тўлдира оламиз. Соманинг келмаганига қайтадиган бўлсам, бу футболчи мавсумлар оралиғида жароҳат олганди. Шу боис Соманинг бироз асрашга қарор қилдим. Чунки миллий чемпионатимиз айни қизғин паллада ва бизни бир қатор қийин кечиши кутилаётган ўйинлар кутмоқда. "Насаф"ни менсимаймиз дея олмайман. Вазиятдан келиб чиқиб шу қарорга келдим. "Насаф" қандай кучга эга эканлигини биламиз ва дастлабки учрашувда ҳам осон бўлмаган ғалабани қўлга киритдик. "Насаф" жамоавий ўйин кўрсатишда жуда кучли. Уларда ҳеч бир футболчини ажратиб кўрсатишдан кўра, бутун бир кучли жамоа сифатида таърифлаш маъқул. "Насаф" ҳамжиҳатликда ва уюшқоқлик футбол ўйнайди. Уларнинг энг катта кучи ҳам шунда.

- "Ал Аҳли" жамоаси учун миллий чемпионатдаги иштирок муҳимми ёки ОЧЛ мусобақаси биринчи ўриндами?
- Биз учун ҳар иккала мусобақа бирдек муҳим аҳамият касб этади. ОЧЛда биз мамлакатимиз номидан иштирок этамиз ва бу турнир шубҳасиз жуда катта мусобақа. Ички чемпионатдаги иштирок ҳар бир жамоа учун доимо керакли ва муҳим. Шу боис ҳеч бирини ажратиб кўрсатмоқчи эмасман. Биз имкон қадар ҳар иккала фронтда ҳам муносиб қатнашмоқчимиз.

- Ҳар доим матбуот анжуманларида Рўзиқул Бердиев ҳақида илиқ фикрлар билдирасиз. Агарда янада очиқрой айтадиган бўлса, бу мураббийнинг қайси сифатлари сизга ёқади?
- Рўзиқул Бердиев замонавий футбол қарашларига эга ва унинг ғоялари ушбу талабга тўлиқ мос тушади. Жамоаси эса жуда уюшқоқ ва чиройли футбол ўйнайди. Унинг шу сифатлари туфайли кучли деб биламан.

Комил Ал Муса: Эртага "Насаф" билан қийин ўйин бўлади. Гуруҳда пешқадамликни сақлаган ҳолда плей-офф босқичига йўлланма олишни истаймиз. Шу боисдан эртага ҳам ўзимиз учун керакли натижани қўлга киритишимиз лозим.