Жамшид Саидов: "Иккинчи бўлимда жамоалар очиқ футболга ўтиб кетишди"

- Ўйин ҳақида

- "Металлург" бугунги учрашувга кучли тайёргарлик кўрганини билар эдик. Ўйин қизиқарли бўлди, айниқса иккинчи бўлим. Вазиятлар ярата олдик. Танаффусдан кейин очиқ футбол бўлиб кетди. Жамоалар ҳужумкор ўйинга ўтишди. Бир очко Африкада ҳам бир очко. Навоийдан келган мухлисларимизга раҳмат. Кейинги учрашувга тайёргарлик кўришни бошлашимиз керак. Май ойида зич тақвим ва ўйинлар кўп.

- Диёр Раҳматуллаевнинг ўзгариши ҳақида гапириб ўтсангиз?

- Раҳматуллаев ўйинга қўшилиб кета олмади ва шу сабабли уни ўзгартирдим. Файзулло Жумақўзиев бугун яхши ўйнай олмади. Икки футболчи ўйин темпига туша олмади. Бундай бўлиб туради ва бу нормал ҳолат.

- Нима сабабдан Лобжанидзе асосий таркибдан жой олмаяпти. У жароҳатидан фориғ бўлдими?

- Лобжанидзени асосий таркибда тушириш хавфли. У ҳали тўлиқ тайёр эмас, секин асталик билан таркибга қўшиб борамиз. Аввалига 10 дақиқа, кейинги учрашувларда 20 дақиқа. Спорт формасига қайтиб олиш учун вақт керак. Ҳали олдинда ўйинлар кўп ва у ўз имкониятига эга бўлиши аниқ.

- "Қизилқум" жамоаси кейинги учрашувларда иккита ҳужумчи билан кўришимиз мумкинми?

- Бундай сирларни оммага ошкор этиш нотўғри(кулади). Биз ҳар бир ўйинга ҳар ҳил тайёргарлик кўрамиз ва режа тузамиз. Рақиблар ҳар ҳил ва уларга қарши турли ҳил услуб танлаймиз. Сўнги мавсумларда чемпионатимиз даражаси яхшигина ўсди. Сифатли жамоалар ва кучли ўйинчилар сони кўпайди. Рақобат ошди. Олимпия терма жамоамиз ҳам Олимпиада ўйинларига йўл олгани бунга далил бўла олади. Ҳозирги кунда "лидер" ва "аутсайдер" деган тушунчалар йўқ.

- Шаҳбоз Жўрабеков бугун майдонда эмоционал ҳаракатланди. Жўрабековнинг майдондаги ҳаракатларига қандай фикр билдира оласиз?

- Футболда эмоциялар бўлиб туради. Бу табиий ҳол. Бугунги ўйин қизиқарли бўлди. Вазиятлар кўп бўлди ва шу сабабли футболчилар бироз қизишиб кетган бўлиши мумкин. Ҳиссиётларсиз ўйин қизиқ бўлмай қолади.