Иван Бошкович: "Шогирдларимга ҳеч қандай эътироз йўқ, "Бухоро"ни финалга чиққани билан табриклайман"

- Ўйин ҳақида фикрингиз?

- Аввало "Бухоро" жамоасини Кубок финалига чиққани билан табриклайман. Улар биринчи бор финалда иштирок этишади ва омад тилайман. Ўйин ҳақида нима дейишим мумкин, жуда қизиқ баҳс гувоҳи бўлдик. Иккита гол ўтказиб қийин вазиятга тушиб қолдик, кейин эса икки бор тўп киритиб мувозанатни тикладик.

Биз рақибнинг кучли томонларини билардик. "Бухоро" стандарт вазиятларда ва тўпни узоққа узатишларда яхши ўйин кўрсатади. Танаффусда керакли кўрсатмаларни бердик, футболчиларга қўлни туширмасликни айтдик. Майдонга чиққач ўз вазиятимизни кутдик, гол уришимизни билардик.

Экстра таймларда ҳам бор кучни бердик. "Бухоро" ҳам яхши ўйин кўрсатди, жарима майдонимиз ичида ва атрофида кўп марта босим ўтказди. Рақиб сафида ёш йигит узоқдан жуда чиройли гол урди. У тўпга зарба беришни усталик билан амалга оширди.

Шогирдларимга ҳеч қандай эътироз йўқ, бугун ҳамма борини бериб ҳаракат қилди. Характер кўрсата олдик. Сифатли ўйин намойиш этдик деб ўйлайман. Кубок баҳси ярим финалга хос тарзда кечди. Олдинга ҳаракат қилишда давом этамиз. Руҳий зарбани қабул қилиб олган бўлишимиз мумкин, лекин бу билан тўхтаб қолмаймиз. Жамоамиз кучли футболчилардан иборат.

- "Бухоро" биринчи бўлимда тезкор иккита гол урди. Бу сизнинг режаларингизга таъсир қилдими?

- Биз рақиб таклиф этадиган ҳар қандай ўйинга тайёр эдик. Албатта, осон бўлмаслигини билардик. Рақиб ўз майдонида, ўз мухлислари қаршисида тўп тепди. Бу ҳам устунлик берди. Биз ҳам ҳаракат қилдик, лекин рақиб имкон бермади. Тўғриси, пенальтилар серияси бўлишини кутдим, бироқ узоқдан йўлланган зарба голга айланди ва шу билан ҳаммаси тугади.

- Дориев тўпурарлар рўйхатида иккинчи ўринда боряпти. Аммо бугун унинг омади келмади.

- Агар ассистлари билан қўшиб ҳисобласак, Дориев биринчи ўринда кетяпти. Биласизми, ҳар ўйинда бир хил ҳаракат қилишнинг имкони йўқ. Дориев яхши футболчи, лекин рақиблар ҳам унга қарши ўйнашади. Баъзи ҳолларда уни ёпиб қўйишади. Дориев гол урмагани учун ютқаздик деган фикрдан йироқман. Футболда ҳар қандай ҳолат учраб туради. Мен ҳамма футболчиларимга раҳмат айтаман. Бугун жамоамиз ёмон ҳаракат қилмади, фақат айтиб ўтганимдек узоқдан киритилган гол ўйинга нуқта қўйди. Афсусланиш керак эмас, чунки яхши ўйин кўрсатдик. Бугун бемалол ухласак бўлади.