Ислом Тошпўлатов: “Бу йил Суперлигада ўйнаб катта тажриба олдим”

Учрашув 1:1 ҳисобида якунланди. Мазкур баҳсдан сўнг “Сурхон” футболчиси Ислом Тошпўлатов фикрларига қулоқ тутдик.

- Қизиқарли ўйин бўлди, - дея гап бошлади Тошпўлатов. Чунки ҳар икки жамоага ҳам ғалаба жуда зарур эди. Дастлабки голни уриб олганимиздан сўнг “Турон” кўпроқ ҳужум ташкил қилишга уринди. Шунинг оқибатида стандард вазиятда ўз дарвозамиздан тўп олиб чиқдик. Умуман олганда, стадионга йиғилган мухлислар чиройли ва муросасиз ўйин гувоҳига айланишди.

Суперлигада қолиш имконияти хусусида
- Бизда Суперлигада қолиш имконияти анча юқори. Олдимизда турган ўйинларда ўзимиз учун керакли натижаларни қайд эта олсак, мақсадимизга эриша оламиз. Бундан ташқари, ўз майдонимизда ўтказадиган баҳсларда Суперлигада қолишимизни кафолатлайдиган очколарни ишлаб олишга уринамиз.

Бу мавсум борасида
- Барқарор ўйин кўрсата олмаётганимизга очиғи ўзимиз ҳам тушунмаяпмиз. Бизда ажойиб мураббийлар штаби меҳнат қилмоқда. Футболчилар ҳам машғулотларда тинимисиз ҳаракат қилиб, жамоавий ўйин даражасини ошириш устида изланмоқдамиз. Ўйлашимча, омад етишмаслиги туфайли муҳим ўйинларда ғалаба қозона олмаяпмиз.

Жорий йилдаги фаолияти тўғрисида
- Кичик жароҳатлар кўп бўлди. Агар уларни ҳисобга олмаганда, Суперлигада ўйнаб, анча тажриба оширдим. Бу эса менга келгуси мавсумларда менга жуда асқотади.

“Нефтчи”нинг Суперлигага қайтиши ҳақида
- Албатта, бундан жуда хурсанд бўлдим. “Нефтчи” Суперлигада тўп тепишга лойиқ жамоа. Ҳозирча “Сурхон” таркибидаман. “Нефтчи”дан келгусида таклиф бўлиши хусусида ўйлаб кўрганимча йўқ. Мавсум якунига етганидан сўнг бу ҳақда ўйлаб кўриш мумкин.