Ислом Аҳмедов: "Ўсмирларимиз ҳаяжонни енгиб олишди"

Ўзбекистон ўсмирлар терма жамоаси 2-турдан сўнг 4 очко билан гуруҳда тўплар нисбатига кўра 1-ўринни эгаллаб турибди. Айни пайтда Бангкок шаҳрида бўлиб турган таниқли мутахассис Ислом Аҳмедовдан терма жамоамиз иштирокида ўтган икки учрашув таҳлили юзасидан қисқача интервью олдик.

- Ишончим комил, ўсмирларимиз гуруҳ ғолиби сифатида чорак финалга йўлланма олишади, - дея сўз бошлади И.Аҳмедов.  Ҳар иккала ўйинни ҳам бевосита стадионда кузатдим. Терма жамоамиз ўйинида ўзгариш бор.

- Мутахассис сифатида ҳар иккала ўйинни таҳлил қилиб берсангиз.
- Терма жамоамиз ҳам жамоавий, ҳам индивидуал жиҳатдан ўсишга эришаётганини айтишим мумкин. Футболчиларда ўзига бўлган ишонч ошмоқда. Бир нарсани унутмаслик лозим, бу ёшда бир текис ўйнаб бўлмайди. Ўсмир болаларнинг руҳий кечинмаларига ҳам кўп нарса боғлиқ. Бир нарсага амин бўлдимки, бизнинг футболчиларда ўйин маҳорати гуруҳдаги рақиб жамоа футболчиларига қараганда юқори. Тўғри, ўйинни ташкил қилиш бўйича камчиликлар бор, лекин буни бартараф қилса бўлади. Биринчи ўйин билан иккинчисининг ўртасида шу жиҳатларда фарқни сездим. Энди ҳозир биринчи галда кечаги ғалабани унутиш керак. Эртага эса бор эътиборни ғалаба қозониш учун қаратиш лозим. Александр Мочинов бу муаммоларни қандай бартараф этишни билади.

- Сизнингча, Непал билан ўйинда футболчиларимизнинг ўйини қовушмадими ёки йигитларимиз шунчаки рақибни менсимай ҳаракат қилишдими?
- Непал билан учрашув терма жамоамизнинг бундай нуфуздаги илк ўйини эди. Футболчиларимиз учун ҳам, бош мураббий учун ҳам синогв бўлди. Аслида ким билан ўйнашнинг аҳамияти йўқ. Рақиб қандай имконият берса, шундан келиб чиқиб ўйнайсиз. Юқорида йигитларда ўзларига бўлган ишончнинг ортаётгани ҳақида гапирдим. Лекин бу бош мақсадимизга эришиш учун айни пайтда камлик қилади. Ярим финалга чиқиб, жаҳон чемпионати йўлланмасини қўлга киритиш учун яна ҳам ўсиш керак.