Интервью. Жоржиньо Вейналдум: “Тажриба қийин пайтда ёрдам беради”
04 авг 2016 22:35
Янгиликлар
![](https://championat.asia/upload/storage/217506_original.jpg)
![](/upload/storage/217506_220.jpg)
Интервью. Жоржиньо Вейналдум: “Тажриба қийин пайтда ёрдам беради”
- Жоржиньо, “Ливерпуль” клубига хуш келибсиз. Бу ерга ўтишингизни қанчалик кутдингиз?
- Буни жуда кутгандим. “Ливерпуль” ажойиб тарихга эга катта клуб ва унинг сафида ўйнаш ҳар бир футболчининг орзусидир.
- Баъзида ўйинчилар қарор қабул қилишдан олдин шериклари, мураббийлари билан маслаҳатлашади. Ўтишингиз тўғрисида бу клуб нимани англатиши борасида ким биландир суҳбатлашдингизми?
- Дўстларим билан гаплашдим. Улар менга бу ажойиб жамоа эканини айтишди. Жонжо Шелвини яхши биламан. У менга “Ливерпул”нинг қанчалик катта экани ҳақида айтиб берди.
- У нима ҳақида гапирди – муҳит, стадион тарихими?
- Ишқибозлар тўғрисида “Ньюкасл” билан бу ерга ўйнаш учун келганимдаёқ билардим. Улар жамоани қўллаб-қувватлаши ва қўшиқ куйлашини кўрганман. Лекин у менга шаҳарни ёқтириб қолишим ва клубда жуда яхши инсонлар ишлашини айтди. Бундан роҳатланишим тўғрисида гапирди.
- Бунгача инглиз клубида ўйнагансиз. “Ньюкасл”да ўтказган мавсумдан кейин ўзингизни тўлиқ тайёр деб ҳисоблайсизми?
- Атрофимдаги одамлар вазифамни осонлаштирмоқда: фақат футбол ҳақида ўйлашим етарли. “Ньюкасл”да ҳам эътиборимни футболга қаратишга урингандим ва бу фойда берганди. Ҳар бир ўйиндан завқ олишга интиламан – кўпинча бу иш берди. Лигадан тушиб кетиш ҳудудида юрганингда завқ олиш қийин, лекин мен Премьер-лигадаги биринчи мавсумни яхши ўтказдим деб ҳисоблайман.
- Ўтган мавсумдаги 11 гол муваффақиятли мавсумни билдиради. Уйдаги ўйинларда яхши ўйнадингиз, бунинг сабаби нимада?
- Билмайман! Уйда жамоа сифатида яхши ўйнадик, аммо сафарда унчалик ижобий таассурот қолдирмадик. Бу тушиб кетишимизнинг асосий сабаби бўлди. Мен учун қайси учрашувда гол уришнинг аҳамияти йўқ. Позициямда буни амалга оширганимдан хурсанд бўлишим лозим, чунки кўплаб ярим ҳимоячилар бу билан мақтана олмайди. Ҳисобингга 11 гол ёзиб қўйиш аксарият ярим ҳимоячилар учун орзу, яна буни биринчи мавсумда амалга ошириш. Қаерда гол уришнинг фарқи йўқ. Муҳими, вазифангни бажариб, жамоа учун ғалабаларни қўлга киритишдир.
- Сизга қаерда ўйнаш ёқади? Баъзида буни аниқлаб олиш осон бўлмайди.
- Ўйлашимча, ҳужумкор футболчи сифатида яхшироқ ўйнайман, чунки тез ҳаракат қиламан ва рақиб дарвозасини ҳимоя ортидан ишғол қилишим мумкин. Бу мен учун идеал вазифа саналади. Голлар ура оламан. Шу билан бирга ўтган йилда бўлгани сингари бошқа позицияларда ҳам ўйнайвераман.
- “Ливерпул” ҳужум чизиғида Коутиньо, Фирмино, Лаллана каби ажойиб ижрочилар ўйнашади. Улар билан бирга майдонга тушиш имкониятини кутяпсизми?
- Албатта. Яхши шериклар билан ёнма-ён ўйнашдан доим хурсанд бўлиш керак. Улар ажойиб ўйинчилар ва улар билан ишлашимни кўрсатишни орзиқиб кутяпман.
- Нега бешинчи рақамни танладингиз?
- “Фейеноорд” учун 9 йил аввал ўйнашни бошлаганимда айнан шу рақамни олгандим, чунки бошқалари банд эди. ПСВда 10-рақамни танлагандим. “Ньюкасл”га ўтгач, танлаш имкони юзага келди: бўш бўлган 5-рақам янги мамлакатда ажойиб старт экани ҳақида ўйладим. Бу ерга келганимда ҳам уни танлашга қарор қилдим.
- “Фейеноорд” учун 16 ёшда ўйнашни бошлагансиз. Бундай эрта майдонга тушиш қанчалик қулай бўлган?
- Ажойиб эди. Барчаси жуда тез рўй берган. Унгача ўзимдан 2 ёш катталар билан ўйнардим. Улар менга 16 ёшимда дебют ўтказишимга имкон беришган. Бу борада менга омад кулган – барчага ҳам бундай вақтли ўйнаш насиб этмайди. Фаолиятимга ҳозир назар ташласам, менда бир қатор кўтарилиш ва пасайиш бўлганини кўраман. Бу мени шахс сифатида ривожлантирган.
- Кўп нарсага эришдингиз: клубларни алмаштирдингиз, Англияга келишдан олдин Голландияда энг яхши футболчи деб топилдингиз. Бунгача тўпланган тажриба фаолиятингизнинг иккинчи қисмида сизга ёрдам беришини ҳис қиласизми?
- Ҳа, тажриба ҳамиша ёрдам беради. Айниқса, бари сен истаган кўринишда кетмаётганда. Мавсумдан кўп нарса ўргандим. У яхши кўринишда кечмади, лекин курашиш нима эканини ҳақиқийсига кўрдим. Афсуски, бу етарли бўлмади. Якунда лигадан тушиб кетдик, бироқ бу мени янада кучлироқ қилди. Янги мамлакат, янги клуб ва ўйинчиларни танидим. Йил мобайнида кўп нарсаларни ўргандим.
- Дирк Куйт жамоада узоқ вақт ўйнаганди. Унинг ўйинларини эслайсизми?
- Ростдан у жуда яхши ўйнаган. Куйт “Фейеноорд”дан бу клубга ўтганди. Райан Бабел ҳам “Ливерпуль” учун ўйнаган. Фаолиятидаги энг яхши лаҳзаларни Дирк айнан шу ерда ўтказган.
- “Ливерпуль”ни ташқаридан кузатгансиз ва жамоа нималарга эришиши мумкин деб ўйлайсиз? Ўзингиз нимага эга чиқишни истайсиз?
- Ҳамма нарса рўй бериши мумкин. Ўтган мавсум “Лестер” чемпионга айланди. Бу бошқа кўплаб жамоалар учун курашиш кераклигини ўргатди. “Ливерпуль” – буюк тарихга эга клуб, лекин ҳамиша янги тарих яратишга уриниш ва унинг бир бўлагига айланишга интилиш лозим. Мен айнан шуни хоҳлайман. Бу ерга ғалаба қозониш учун келдим. Бунинг учун қўлимдан келганини ишга соламан.
- Юрген Клопп ҳақида таассуротларингиз қандай?
- У жуда ажойиб инсон, бироқ ҳозирча у билан ишлаш имконига эга бўламадим. Унинг мураббий сифатида ўзини тутиши ва ўйиндан завқ олишини кузатишни ёқтирганман. Клопп ишга борини беради ва у билан ишлашни бошлашни орзиқиб кутяпман. Бир марта кўришиб, суҳбатлашдик. Шундан кейин “Ливерпуль” билан шартнома тузишни истадим. Клубга ўтишни мени ишонтирди.
Беҳзод Назаров
Ўхшаш янгиликлар
![AMP Logo](https://championat.asia/image/logo-amp.png)
Фикрлар