Илёс Зейтуллаев: "Ўтган йилги ўрнимизни яхшилашни мақсад қилганмиз"

- Ўйин ҳақида фикрингиз?

- Ҳаммага хайрли кеч. Ўйлашимча, ўйин анча қизиқ кечди. Биз бу баҳсга яхши тайёргарлик кўргандик. Афсуски, тезкор гол ўтказиб юбордик. Бу эса руҳий жиҳатдан таъсир қилди. Иккинчи тайм анчагина қизиқ кечди. Ҳар икки жамоа мухлисларга ёқадиган футбол намойиш этди.

- Иккита ҳар хил тайм гувоҳи бўлдик. Нима учун биринчи таймда "Бунёдкор" кўринмади?

- Саволингиз учун раҳмат. Ҳимояда хатолар кузатилган бўлиши мумкин. Чап қанот ҳимоясида чапақай футболчи ўйнаши керак. Биз Бугаринни чап қанотга қўймадик. Бу мавсум Нажмиддин Нормуродов кўп ўйинларни чап қанот ҳимоячиси сифатида ўтказди. Шундай қилишимизга тўғри келяпти. "Пахтакор" кўп босим уюштиргани туфайли хатолар кузатилди.

Сўнгра футболчилар жойини алмаштирдик: Бугарин чапга ўтди, Нажмиддин эса ўнг қанотда ўйнай бошлади. "Пахтакор" яқинда Кубок соҳиби бўлди ва бу билан жамоани табриклайман. Яна бир нарсани унутмаслик керак, "Пахтакор"да иккита тенг кучли таркиб бор. Захирадан тушган футболчилар ҳам бирданига ўйинга қўшилиб кета оляпти. Бунинг учун бош мураббий Камолиддин Тожиев катта ҳажмдаги ишни олиб боряпти.

- Бугун Ҳожиакбар Алижонов тўп билан бемалол олдинга бориб жуда чиройли гол урди. Ҳамма унинг қандай ўйнашини билади, лекин футболчилар шунчаки томошабиндек қараб қолди.

- Алижонов қандай ўйин намойиш этишини биз ҳам билардик. Алижонов сифатли ўйин кўрсатади, у Ўзбекистон чемпионатидаги энг кучли футболчилардан бири. Бугун ҳам ўзини кўрсата олди ва бу вазиятда бизнинг футболчилар ҳеч нарса қила олмади. Футбол шуниси билан қизиқ. Алижоновга ўхшаган футболчиларни қафасга қамаб қўя олмайсиз, уни ёпишга уринсангиз бошқача ўйин намойиш этишни бошлайди.

- Кейинги турларда жамоа олдига қандай мақсад қўйилади?

- Ўтган йилги ўрнимизни яхшилашни мақсад қилганмиз. Ўтган мавсум чемпионатни 10-ўринда тугатгандик. Бу йил эса янада юқоридан жой олишга ҳаракат қиляпмиз. Ўзбекистонда футбол савияси ошган, кучли жамоалар кўпайди, чемпионатдаги шиддат ҳам ўсяпти.

- Мавсум якуни арафасида кимлар кетиши ва кимлар келиши ҳақидаги гап-сўзлар кўпаяди. Қозоғистонлик журналистлар Итсуки Уратага "Актобе" қизиқаётганини ёзишди.

- Агар мен ҳам биронта янгилик айтадиган бўлсам, бирон бир футболчига "Реал" Мадрид қизиқаётгани ҳақида ёзиш ростан ҳам "Реал" Мадрид қизиқаётганини билдирмаслиги мумкин.