Ҳусниддин Ғофуров: "Олий лига жамоасига ўтмаслигим аниқ"

Хабарингиз бор, 20 ёшли футболчи Сербиянинг "Явор" клуби аъзоси ҳисобланади. Яқинда фарғоналик ҳужумчини юртимизга қайтаётгани ва олий лиганинг бирор-бир клубига ўтиш ҳақида хабарлар пайдо бўлганди.

Вазиятга ойдинлик киритиш мақсадида унинг ўзи билан боғланганимизда қуйидагиларни таъкидлади:

- Биласизми ҳозир Сербия чемпионатида танаффус. Биринчи давра ўйинлари ўз поёнига етган. Шу боис юртимга қайтиб келдим. Айни дамда Тошкентдаман. Кутилмаганда жароҳат олиб, сафдан чиққандим. Шундан кейин табиийки бир нечта машғулотларни ўтказиб юборишга мажбур бўлдим. Ҳозир ҳаммаси яхши. Аввалги спорт формамга кириш учун ҳар куни ўзим якка тартибда шуғулланяпман. Сербияга янги йилда кетаман. Ўзбекистонга қайтиб, олий лига жамоасига ўтишим борасида мен ҳам эшитдим. Лекин бу миш-миш. Европада ўйнаш иштиёқи кучли. Шу боис яна "Явор"га қайтиб кетмоқчиман, - дейди Ғофуров.