Ҳасанбой Эргашев: “Олтиариқда “Пахтакор”га осон бўлмайди”

Про-лиганинг дебютанти “Ифтихор” Ўзбекистон Кубогининг нимчорак финалида Суперлига вакили Тошкентнинг “Пахтакор” жамоасини қабул қилади. Фарғона вилояти, Олтиариқ туманида кечадиган бўлажак учрашув олдидан мезбонларнинг етакчиси Ҳасанбой Эргашев ўз фикрларини билдириб ўтди.

- Эртага чемпионат доирасида сафарда “Ғиждувон”га қарши ўйинимиз бор. Шунинг учун кеча йўлда бўлиб, ТВ орқали қуръа маросимини кўра олмадик. Кейинчалик Кубокдаги навбатдаги рақибимиз ҳақида хабар топдик. Энди нимчорак финалда, мамлакатимизнинг байроқдор клуби – “Пахтакор”га қарши майдонга чиқамиз. Мазкур босқич ўйини ҳам битта баҳсдан иборат бўлишини инобатга олиб айтадиган бўлсак, ўз уйимиздаги учрашувни ижобий томонга ҳал қилсак бўлади. Яхши биласиз, водийдаги ўйинларда меҳмон жамоага осон бўлмайди. Мухлисларнинг босими ҳам катта ўрин тутади. Шу боис ҳозирдан бемалол айтишим мумкинки, “Пахтакор”га Олтиариқда осон бўлмайди. Чунки стадион трибунаси мухлислар билан тўлиб-тошишига шубҳа йўқ. Ҳақиқий аншлаг бўлиши турган гап. Ишқибозларимизнинг қўллаб-қувватлаши натижасида ҳам рақибни мағлуб этишимиз мумкин. Ҳозирдан “Пахтакор”га тайёргарликни бошлаб юбордик.

- Кубокда нимчорак финалда, “Нефтчи” билан ўйнашимизни кутгандик. Лекин улар “Қўқон-1912”га қарши тўп сурадиган бўлди.

- Бизда янги жамоа тузилган. Шу боис жамоавий ўйин ҳам аста-секин шаклланмоқда. Кўз тегмасин йигитлар ҳозир бир-бирларини анча яхши тушунмоқда.

- Чемпионатдаги мақсадимиз ўз гуруҳимизда 1-ўринни эгаллаш. Кубокда ҳам ҳар бир ўйинда ғалаба қозониш вазифаси қўйилган – дейди Ҳасанбой Эргашев.