Ғулом-Ҳайдар Гулямов: “Омад “Насаф”га кулиб боқди”

- Ўйин жанговор руҳда ўтди. Аммо бугун омад рақиб жамоасига кулиб боқди. “Насаф” таркибидаги футболчилар жамоада бир неча йилдан бери бирга тўп суриб келишади. Шу сабаб, улар бир-бирларини тезда тушинишиб, ўйинга киришиб кетишади. Лекин бу билан рақибимиз бугун биздан кучлироқ ўйнади, деб ўйламайман. Учрашув якунида эътиборни бироз четда қолдирдик ва қаршиликлар бундан оқилона фойдаланиб қолишди.

- Ўйин  давомидаги тўлиқ устунликни ушлаб туришга таркибдаги ўзгаришлар таъсир қилдими ёки бунга бошқа сабабларни кўрсатган бўлармидингиз?

- Футбол жамоавий ўйин. Захирадан тушган футболчилар ёмон ўйнади, деб айтолмайман. Аммо захирадан ўйинга тушган футболчи учун курашга киришиб кетиш бироз қийинроқ кечади. Бундан ташқари таркибимизда аксарият футболчилар янги. Тан олиш керак, бу борада рақибимизда муаммолар камроқ. Шу сабабли, бу камчилигимизни тўғирлаш устида кўпроқ ишлашимиз керак, деб ўйлайман.

- “Насаф” жамоаси тиғиз тузилган ўйинлар жадвали сабабли таркибидаги ўйинчилар чарчашган ва очиқ футбол намоён қилишмади, шу сабабли “Шўртан” бугун фаолроқ кўринди, деган фикрлар билдирилди. Сиз ҳам шундай, деб ўйлайсизми?

- Бу ҳақида бирор бир фикр билдира олмайман. Сабаби рақиб жамоанинг ички аҳволи фақатгина уларнинг ўзларига аён. Лекин бугунги ўйинда бу нарса сезилмади. Учрашув “дерби”га хос кескин ва муросасиз курашларга бой тарзда ўтди ва ҳар икки жамоа  футболчилари ҳаракатларида чарчоқ сезилди, деб айтолмайман.