Фарҳод Бекмуротов: "Ғалабага тенг бўлган дуранг қайд этдик"

Мазкур тур доирасида "Суғдиёна" жамоаси меҳмони бўлган "бургутлар" ортга қимматли бир очко билан қайтадиган бўлишди. Ўтган учрашувларда пойтахт жамоаларидан уч очко тортиб олган Улуғбек Бақоев шогирдлари "Андижон" билан беллашувда етарлича қаршиликка дуч келишди. Мезбонларни ғалабадан мосуво қилган андижонликлар сардори Фарҳод Бекмуротов фикрлари билан ўртоқлашди.

"Натижадан келиб чиқиб айтадиган бўлсам ғалабага тенг дуранг бўлди. Чунки, рақибимиз биздан олдин пойтахтнинг икки гранд жамоасини ютганди. Биз ҳам, "Суғдиёна" ҳам ёмон ўйин ўтказмадик. Ўзимизда куч ва ирода топиш устида руҳан машғулотларда ишлагандик. Бу эса бугун ўз мевасини берди. Ўйлайманки, мураббийларимизни кўрсатмаларини тўғри бажара олдик. Барчамиз бир ёқадан бош чиқариб рақибнинг кучли томонларини зарарсизлантирдик. 

Виктор Кумиковнинг фалсафасини тушуниб бормоқдамиз. Анча ўзлаштириб олдик. Кумиковнинг тажрибаси катталиги бизга фойда бериши мумкин. Гол урган вазиятимда Дониёр Абдуманнопов тўпни аниқ ташлаб берди. Тўп киритишимни ичимдан ҳис қилаётгандим. Бунга ўзимда ишонч бор эди",- дейди Фарҳод Бекмуротов.