Фарғонада "Маҳаллада футбол" мусобақаси старт олди
08 сен 2020 15:00
Янгиликлар

Фарғонада "Маҳаллада футбол" мусобақаси старт олди

Шу кунларда Республикамиз бўйлаб Ўзбекистон Республикаси Жисмоний тарбия ва спорт вазирлиги, Маҳалла ва оилани қўллаб қувватлаш вазирлиги, Ўзбекистон Футбол Ассоциацияси ва бошқа мутасадди ташкилотлар ташаббуслари билан "Маҳаллада футбол" мусобақалари ташкил этилмоқда.

Хусусан бугун Фарғонада мазкур мусобақа старт олди.

13-14 ёшли болалар ўртасида ўтказилган мазкур мусобақада Ўзбекистон футбол Ассоциацияси вакили Маъмур Саидқосимов, Фарғона вилояти футбол Ассоциацияси биринчи вице-президенти Носир Отақўзиев, турли даражадаги ОАВ вакиллари ва кўплаб масъул ташкилотлар ходимлари иштирок этмоқдалар. "Маҳаллада футбол" мусобақаси бутун Республикамиз бўйлаб кўтаринки кайфиятда ташкил этилмоқда.

Мазкур мусобақа тафсилотлари юзасидан Фарғона вилояти футбол Ассоциацияси биринчи вице-президенти Носир Отақўзиев қуйидаги фикрларни билдирди.

"Республикамиз бўйлаб карантин талаблари юмшатилганлиги туфайли аста-секин турли даражадаги футбол мусобақалари ташкил этилмоқда. Хусусан муҳтарам Президентимизнинг футболни ривожлантириш тўғрисидаги фармонлари ижроси юзасидан куни кеча Марғилон шаҳрида "Футболимиз келажаги" мусобақасини ташкил этдик. Бугун эса гувоҳи бўлганингиздек, "Маҳаллада футбол" мусобақалари бўлиб ўтмоқда. Бу ўз-ўзидан Республикамизда, шунингдек Фарғона вилоятида футболга бўлган эътиборнинг юқори эканлигидан далолат беради.

Футбол мусобақаларидан кўриб турибмизки, карантин даврида ёш футболчилар ўйинларни соғиниб қолишган. Мусобақаларга улардаги иштиёқ ва қизиқишни кўриб барчамиз бирдек хурсандмиз" - дейди Носир Отақўзиев.