UZ

Сўнгги янгиликлар

10:28«Бавария» Алонсони қўлга кирита олмаганидан сўнг бошқа бир топ мураббий билан шартнома тузмоқчи  1 10:00ЦСКА устози РПЛнинг энг кучли футболчиси кимлигини айтди  2 09:3410 ойга четлатилган Тонали яна узоқ муддатга дисквалификация қилиниши мумкин  0 09:10«РБ Лейпциг» грандлар қизиқаётган футболчига нарх қўйди  1 08:47Златан рамзий термасини тузди ва ўзини қўшмади. Нега қўшмаганини эса Ибра супер тарзда тушунтириб берди  6 08:25Фабрицио Романо Хаби Алонсонинг келажагини очиқлади  4 07:49Про лига. Бугун учинчи тур якунланади  1 07:25Суперлига. Бугун Олмалиқ ва Қаршида ўйинлар бор  2 01:46"Фулхэм" стадион трибунасида очиқ бассейн қурмоқчи  1 01:29Абдуқодир Ҳусанов "Лилль" билан ўйинни ўтказиб юборади  3 00:52Италиялик жаҳон чемпиони Қозоғистонга ташриф буюрди  8 00:35Роналдунинг либосини кийган таниқли блогер Мессига алоқадор ресторандан ҳайдаб юборилди  15 00:18Вадим Абрамов: Самарқанд — иккинчи пойтахт. Шундай экан, бу ерда яхши жамоа бўлиши керак"  18 23:37БАА футбол федерацияси ёшини сохталаштирган 18 нафар мисрлик футболчини депортация қилди  2 23:10Веско Стешивич: "Биринчи бўлимда яна битта гол урганимизда, ғалаба бизники бўларди"  1

Европада ёзги трансфер ойнаси натижалари Янгиликлар

Европада ёзги трансфер ойнаси натижалари

Ким барчадан яхшироқ кучайди?

Европада 2022/2023 йилги футбол мавсумини очиқ деб ҳисобласак ҳам бўлади. Ҳа, баъзи жамоалар еврокубок саралашидаги ўйинларини бошлади, аммо мухлислар етакчи чемпионатлар стартини кутишган эди. "Championat.Asia" мухбири Николай Егоричев ТОП-5 лигадаги ёзги трансфер ойнаси бўйича материал тайёрлади. 

Ким сафини яхшироқ кучайтирди, ким қанча пул сарфлади ва қайси трансферларни алоҳида таъкидлаб ўтиш мумкин?


АПЛ

Англияда кетма-кет иккинчи йил "Арсенал" ҳаммадан кўп пул сарфламоқда. "Канонирлар" таркибини кучайтириш учун 132 миллион евро ишлатишди — Европада фақатгина "Барселона" (153) ва "Бавария"да (137,5) кўпроқ харажат. Албатта, "Арсенал" сафини тўлдирган футболчиларни ҳам алоҳида таъкидлаш жоиз. Габи Жезус, Александр Зинченко — "канонирлар"ни аниқ кучайтира оладиган ўйинчилардир. Микель Артета жамоасига анчадан буён ёрқин форвард етишмасди, украиналик эса майдонда бир нечта позицияни ёпа олади. Португалиялик Фабиу Виейра борасида ҳозирча бир нима дейиш қийин. У "Порту"да ўзини кўрсата олганди, бироқ АПЛга мослашиш осон эмас.

Айтганча, кўникиш борасида гапирадиган бўлсак, "Манчестер Сити" ва "Ливерпуль" талайгина пул сарфлаган (60 ва 75 миллион евро) Эрлинг Холанд ва Дарвин Нуньес ҳали ўзини кўрсата олишмади. Улар инглиз футболига кўникиши учун қанчадир вақт керак бўлади. Бу мавсум улардан аввалги клубидаги каби самарали ўйин кутмаган маъқул.

Ҳоланддан ташқари, "Манчестер Сити" яна бир катта трансфер амалга оширди. Жамоа сафини "Лидс" ўйинчиси Кэлвин Филлипс (48,8 млн евро) тўлдирди. Гарчи таянч нуқтада асосий футболчи Родри бўлиши ҳаммага аён бўлса-да, Кэлвин "шаҳарликлар"нинг шу позициясини мустаҳкамлаш учун чақиртирилди. Лекин Пеп Гвардиола унинг жамоасида бир даражада ўйнай оладиган камида иккита футболчи бўлиши кераклигига кўпчиликни ўргатди — рақобат учун ва жароҳат бўлса.

Кутилмаганда "Лидс" бу ёзда жуда кўп пул сарфлади — 108,6 миллион евро. Бу ПСЖ, "Ювентус" ва Дортмунд "Боруссия"си ишлатган пулдан ҳам кўпроқ. "Оқлар" таркибини икки ёш америкалик — Бренден Ааронсон ("Ред Булл" Зальцбург") ва Тайлер Адамс ("Лейпциг") билан тўлдирди. Бундан ташқари, қатор номдор жамоалар қизиқиш билдирганига қарамай, "Фейеноорд" вингери Луис Синистерра ҳам "товуслар"га келиб қўшилди.

"Челси" учта катта трансфер амалга ошириб улгурди: Раҳим Стерлинг, Калиду Кулибали ва Марк Кукурелья. "Аристократлар" улар учун 160 миллион евро атрофида пул сарфлашди. Лондоннинг бошқа клуби — "Тоттенхэм"га эса Иван Перешич, Ришарлисон ва Ив Биссума ўтди. "МЮ" 2 тагина харид билан чегараланди — Кристиан Эриксен ва Лисандро Мартинес ("Аякс"). Бироқ "қизил иблислар"нинг асосий ютуғи Кришитану Роналду ҳали жамоадан кетмагани бўлиб турибди. Португалиялик 37 ёш бўлса-да, ҳамон юқори даражадаги футболчи бўлиб қолмоқда.


Бундеслига

"Бавария" Чемпионлар Лигасида шовқин кўтаришга тайёр турибди. Мюнхенликлар Маттейс де Лигт ва Садио Мане билан битим имзолаганини бошқа қандай изоҳлаш мумкин? Шунингдек, "Аякс" шарафини ҳимоя қилган Райан Гравенберх ва Нуссаир Мазрауи ҳамда "Ренн"нинг ёш иқтидорли ўйинчиси Матис Телни эсдан чиқармаслик лозим.  "Бавария" умумий ҳисобда137,5 миллион евро сарфлади. Мюнхенликлар охирги марта 2019/2020 йилги мавсумда шунча кўп пул ишлатишган эди (139,5 млн евро). Лекин ўша пулларнинг асосий қисми Лукас Эрнандес учун (80 млн евро) тўлаб берилган.

Дортмунд "Боруссия"си Холандни сотиб, 2 та ҳужумчи олишга қарор қилди. Жамоа сафини Себастьян Алле ("Аякс" 31 млн евро) ва Карим Адейеми ("РБ Зальцбург" 30 млн евро) тўлдирди. Афсуски, Аллер "Боруссия"га ёрдам беришга ҳали тайёр эмас (унда саратон касаллиги аниқланди). Себастьян қачон сафга қайтиши аниқ эмас. Дортмундликлар мудофаа чизиғини ҳам ёддан чиқаришмади ва икки ҳимоячи — Нико Шлоттербек ва Никлас Зюле билан битим тузишди. Яқинда Германия термасида дебют қилган Шлоттербек "Боруссия"га 20 миллион еврога тушди. Зюлега келсак, у шартномаси тугагач, "Бавария"дан кетди ва "асаларилар"га эркин агент сифатида қўшилди.

"РБ Лейпциг" бу ёз трансферлар ойнасида анча камтарона ҳаракат қилди. Клуб асосан сотиш билан шуғулланди ва 77 миллион евро ишлаб олди. "Буқалар" умумий ҳисобда 38 миллион евро ишлатишди: Давид Раум ("Хоффенхайм") ва Ксавер Шлагер ("Вольфсбург"). Бундеслигани кузатмайдиган одам бу футболчилар ҳақида бирор нарса дейиши қийин. Раум айни дамда Германия терма жамоасининг асосий чап ҳимоячиси, Шлагер эса Германия чемпионатининг энг яхши марказий ярим ҳимоячиларидан бири саналади.

Бошқа трансферлардан чехиялик ёш форвард Адам Гложек "Байер"га ўтгани ва Марио Гётце Бундеслигага қайтганини қайд этиш мумкин. Немис футболининг "олтин боласи" ПСВдан "Айнтрахт"га ўтди.


А Серия

Италия чемпионатининг энг кўп харажат қилган клуби — "Ювентус" бўлди. Туринликлар деярли 90 миллион евро ишлатишди, лекин Маттейс де Лигт, Мерих Демирал ва Роналдо Мандрагорани сотиб, фойдада қолишди (+9 млн евро). Шу билан бирга, Пауло Дибала, Федерико Бернардески, Дуглас Коста, Жоржо Кьеллини ва Аарон Рэмзи "Юве"дан текинга кетди. Клуб сафига "Торино" ҳимоячиси Бремер келиб қўшилди, 40 миллион евро Федерико Кьеза трансферининг қолган қисми учун сарфланди, Поль Погба ва Анхель Ди Мария билан эркин агент сифатида шартнома имзоланди. Ўз вақтида "Манчестер Юнайтед" сарфлаган каттагина пулни оқлай олмаган Поль Погбанинг "Юве"га қайтиши катта қизиқиш уйғотмоқда.

Харажат борасида "Аталанта" иккинчи бўлди. Бергамоликлар "Сассуоло"дан Жереми Богани, "Ювентус"дан эса ҳимоячи Мерих Демирални харид қилишди. Шунингдек, "Аталанта" бразилиялик хавбек Эдерсон (21 млн евро) ва "РБ Лейпциг" футболчиси Адемола Лукман (9 млн евро) билан ҳам битим имзолади.

"Рома" Туркия термаси ҳимоячиси Зеки Челик учун 7 миллион евро сарфлади. Бундан ташқари, Жозе Моуринью жамоаси сафига Пауло Дибала ва Неманья Матич келиб қўшилди. Улар Рим клубига текинга тушди. Бошқа трансферлардан грузиялик вингер Хвича Кварацхелия "Наполи"га ўтди, "Милан" бельгиялик иқтидор Шарль де Кетеларени 32 млн еврога сотиб олди, Дивок Ориги эркин агент сифатида "Милан" таркибига қўшилди, Ромелу Лукаку "Интер"га қайтди (8 млн евро эвазига ижара) ва "Милан" собиқ сардори Алессио Романьоли эркин агент сифатида "Лацио" сафини тўлдирди.


Примера

Испаниянинг асосий "ньюсмейкери" "Барселона" бўлди. Каталонияликлар яқинда катта молиявий қийинчиликни бошдан ўтказиб, Лео Мессини ПСЖга қўйиб юборишга мажбур бўлишганди. "Барса" шу ёз 150 миллион евродан кўпроқ пул сарфлади! Аввало, Роберт Левандовски (40 млн евро) ва Жюль Кунде (50 млн евро) трансферлари кўзга ташланади. Бундан ташқари, каталонияликлар 58 миллион еврога "Лидс" ўйинчиси Рафинья билан шартнома имзолашди. Иккита топ-футболчи — "Милан" шарафини ҳимоя қилган Франк Кессье ва "Челси" собиқ ҳимоячиси Андреас Кристенсенни эса текинга олишди. Энди "Барса"нинг таркиби анча кучайди, ҳаттоки, баъзи позицияда бир нечтадан ўйинчи бор.

"Реал" 80 миллион евро сарфлади. Бу сумманинг ҳаммаси "Монако" вундеркинди Орельен Чуамени учун ишлатилди. Шунингдек, "Қироллик клуби" аввал "Челси"да тўп тепган Антонио Рюдигерни текинга олди. Гарет Бэйл, Марсело, Иско ва Лука Йович "Реал"дан кетди.

Ўтган мавсум ажойиб ўйинлар намойиш этган "Вильярреал" 39 ёшли Пепе Рейнани текинга қўлга киритди. "Севилья" Маркаони "Галатасарой"дан сотиб олди, "Манчестер Юнайтед"да ўзини кўрсата олмаган Алекс Теллесни эса ижарага олди. "Милан" шарафини ҳимоя қилган Саму Кастильехо эркин агент сифатида "Валенсия"га ўтди. "Атлетико" эса "Удинезе"нинг аргентиналик ҳимоячиси Науэль Молинани сотиб олди, Аксель Витселни эса текинга қўлга киритди.


Лига 1

ПСЖ кутилганидек Францияда энг кўп харажат қилган клуб бўлди — 106,5 млн евро. Парижликлар сафини 3та португал тўлдирди: Витинья, Нуну Мендеш ва Ренату Санчеш. Бундан ташқари, ПСЖ ўнг қанот ҳимоя позициясини "РБ Лейпциг" футболчиси Норди Мукиеле билан мустаҳкамлашга қарор қилди. "Реймс"да тўп тепган иқтидорли форвард Уго Экитике ижара ҳуқуқлари асосида "парижликлар" таркибига кирди. Анхель Ди Мария, дарвозабон Альфонс Ареоля ("Вест Хэм" уни сотиб олди) ва ўсмирлик пайти Педридан ҳам юқори баҳоланган "Барса" тарбияланувчиси Хави Симонс ҳам ПСЖдан кетди.

"Монако" Такуми Минамино ва Брель Эмболо билан ўз сафини кучайтирди. Сеск Фабрегас жамоадан кетиб, Италия В Сериясидаги "Комо" клубига ўтди. "Лион" эса "Аякс" футболчиси Николас Тальяфико билан шартнома имзолади, Корентен Толиссо ва Александр Ляказетт жонажон клубига қайтди. "Марсель" ўтган мавсум ўз сафида ижара ҳуқуқлари асосида тўп тепган тўрт футболчини сотиб олди: Маттео Гендузи, Ченгиз Ундер, Аркадиуш Милик ва Пау Лопес. Шунингдек, Москванинг "Спартак" клубидаги ўйини билан танилган Самюэль Жиго ҳам "Марсель"га ўтди.

Николай Егоричев

Нозима Зарипова таржимаси

Рейтинг: +2   

Фикрлар

championat.asia
< сўнгги янгиликларни кўриш
Яндекс.Метрика